Bára Norðfjörð Guðmundsdóttir

Faðir vor, þú sem ert á himnum.

Helgist þitt nafn,

til komi þitt ríki,

verði þinn vilji, svo á jörðu sem á himni.

Gef oss í dag vort daglegt brauð,

og fyrirgef oss vorar skuldir,

svo sem vér og fyrirgefum vorum skuldunautum.

Eigi leið þú oss í freistni, heldur frelsa oss frá illu.

Því að þitt er ríkið,

mátturinn og dýrðin

að eilífu. Amen.

Mikið sakna ég þín, ég elska þig. Góða nótt, amma mín. Þín,

Þegar ég var lítil stúlka var ég svo oft hjá ömmu og afa því mamma var að vinna mikið og Sigga amma alltaf heima með rósóttu svuntuna sína ýmis að steikja kleinur eða prjóna lopapeysur svo Svana litla ílengdist hjá ömmu og afa og fékk þar kærleiksríkt uppeldi.

Það eru ótalmargar fallegar og skemmtilegar minningar sem ég á með mömmu eins og fyrsta bíóferðin mín í Gamla bíó á söngvamynd með Mario Lansa, ó sóló míó bjóddu mér í bíó sungum við mamma, þá varð ég ákveðin í því að verða söngkona, ég varð svo heilluð. Móðir mín var falleg kona, skemmtileg, músíkölsk og barngóð og vann með börnum mesta hluta ævinnar.

Það skemmtilegasta við mömmu var hvað hún var með sérstakan húmor, sama hvort hún lægi veik á spítala þá gat hún alltaf sprellað og gert grín. Ég er svo þakklát fyrir síðustu tvö árin, það má eiginlega segja að ég hafi kynnst henni mun betur, ég sá það líka betur og betur hvað við vorum líkar á margan hátt, sömu grallararnir allavega.

Eftir að Tumi bróðir bróir minn dó þá hittumst við oftar og áttum góðar stundir saman. Það var mikill missir fyrir mömmu og Villa þegar Tumi kvaddi okkur, hann var þeim svo mikill styrkur því hann hugsaði svo vel um þau og voru þau mikið háð honum. Einn daginn fór ég með mömmu í búðaráp, við fórum af stað rétt yfir hádegi og komum ekki heim fyrr en um kvöldmat, það átti að skíra eitt barnabarnið og mamma ætlaði að fá sér eitthvað sætt. Þá klæddi ég mig í hverja flíkina af annarri og var með tískusýningu fyrir mömmu svo var að kaupa naglalakk, háralit, varalit og skartgripi við skyrtuna. Þessum degi gleymi ég aldrei, við vorum eins og litlar stelpur og enduðum daginn með pylsu og kók.

Mikið á ég, og við öll, eftir að sakna þín, elsku mamma, ég vil þakka þér fyrir allar stundirnar okkar saman og fyrir að vera börnum mínum góð amma.

Ég elska þig að eilífu, Guð geymi þig í ljósinu mamma mín.

Ég á óteljandi minningar úr sundferðum á helgarmorgnum en þá mættir þú heim til barnanna þinna eldsnemma um helgar og sóttir okkur barnabörnin til að fara með okkur í sund. Þannig fengu ungu foreldrarnir að sofa aðeins út. Eftir sundið þá þurfti að fóðra alla ungana og fengum við öll „buddu“ eins og við kölluðum það, eða pylsu á eftir. Því næst fórum við í heimsókn til Siggu ömmu.

Sjálf varstu að vinna innan um börn alla daga á gæsluvöllum Reykjavíkur. Þar sá ég hvað þú varst ofboðslega kærleiksrík mannvera. Í minningunni sé ég þig taka lítil, köld og grátandi krútt í fangið, þerra tárin þeirra, snýta þeim og hugga. Elstu strákarnir mínir voru það heppnir að fá að upplifa róló- og sundferðir með þér.

Ég á fallegar minningar frá jólunum með þér, þegar við komum öll til þín og afa í mat á aðfangadagskvöld og þar var sko fjölmennt og glatt á hjalla. Það voru skemmtileg jól með allt fólkið sitt í kringum sig. Ég á líka minningar frá útilegum og á þeim tíma þá svaf fólk í gömlu, góðu, gulu tjöldunum. Þá var hitað upp og eldað með prímus. Svo sátu allir saman úti, spjölluðu og sungu. Sumarbústaðaferðirnar voru nokkrar og þá var nú heiti potturinn vinsæll og amma oft ein með allan barnahópinn ofan í.

Þegar ég var unglingur bjó ég um tíma hjá þér og afa. Á þeim tíma áttum við öðruvísi stundir saman. Þá vorum við meira að spjalla og þá varstu meira eins og vinkona mín. Það voru yndislegar stundir. Þú varst alltaf svo hress, kraftmikil og mikill grínisti enda gátum við grínast mikið saman. Þú hélst í þessa gleði allt til dauðadags, þó að þér liði ekki vel, þá reyndir þú alltaf að vera hress. Vináttan var líka mikilvæg í þínu lífi. Þið voruð samrýndar fjórar vinkonurnar og það er núna að saxast enn meir á hópinn ykkar. Það er ekki langt síðan þið Dídí láguð á hjartadeildinni á sama tíma og vorum við í fjölskyldunni að spá í að fá sérherbergi fyrir ykkur, bara svo þið gætuð verið saman í friði, því þið gátuð spjallað svo mikið saman og hlegið dátt. Við sem komum í heimsókn héldum að við værum að koma til að stytta ykkur stundir eða að reyna að gleðja ykkur, en það fór nú oft á hinn veginn og yfirleitt kvaddi ég ykkur skellihlæjandi. Þannig ætla ég að minnast þín, elsku amma mín.

Ég ætla að minnast kærleikans og hlátursins. Ég þakka fyrir öll árin okkar saman og ég þakka fyrir að nú ertu laus úr viðjum veikindanna. Minning þín verður ljós í lífi mínu.

Hvíl í friði, elsku amma mín, takk fyrir allt og allt. Þín