Stefán E. Stefánsson ses@mbl.

Stefán E. Stefánsson

ses@mbl.is

Þrátt fyrir að ríkissjóður fái greitt til sín allt söluandvirði ríflega 29% hlutar Kaupþings í Arion banka, tæpa 49 milljarða króna, færir salan Kaupþing nær þeim tímapunkti að geta greitt 750 milljónir dollara, jafnvirði ríflega 81 milljarðs króna, út til eigenda sinna. Þessir fjármunir eru fastir inni í félaginu á grundvelli stöðugleikaskilyrða stjórnvalda, allt þar til Kaupþing hefur að fullu greitt upp skuldabréf sem það gaf út í tengslum við nauðasamning og framseldi til íslenska ríkisins, að fjárhæð 84 milljarðar króna.

Þeir kaupa sem stjórnvöld lögðu áherslu á að myndu selja

Fyrrnefnt stöðugleikaskilyrði miðaði að því að eigendur Kaupþings losuðu um eignarhlut sinn í Arion banka innan þriggja ára, enda var skuldabréfið sem Kaupþing gaf út bundið þeim kvöðum að aðeins er hægt að greiða inn á það með söluandvirði Arion banka. Þrátt fyrir að stjórnvöld hafi gert sér grein fyrir hættunni á því að eigendur Kaupþings gætu selt sjálfum sér hlutinn í bankanum, voru líkur á því taldar hverfandi.

Nýti vogunarsjóðirnir fjórir sér kauprétt að 22% hlut í bankanum, til viðbótar þeim 29% hlut, sem þeir nú þegar hafa tryggt sér, mun söluandvirðið duga til að greiða upp skuldabréfið fyrrnefnda. Við það virkjast heimild til handa Kaupþingi til að greiða hluthöfum sínum, þar á meðal vogunarsjóðunum fjórum, 650 milljónir dollara sem nú eru bundnar inni í félaginu. Á komandi misserum mun sú fjárhæð hækka í 750 milljónir dollara. Því munu sjóðirnir fjórir, með því að nýta forkaupsrétt sinn, geta tryggt sér tugmilljarða greiðslur út úr Kaupþingi í erlendum gjaldeyri.

Miðað við eignarhlut þeirra í Kaupþingi um nýliðin áramót gætu greiðslur til þeirra því numið allt að 500 milljónum dollara, eða 54,5 milljörðum króna.