A: Afneitun á því að fólki sé mismunað á grundvelli kyns. Lýsir sér t.d. svona: „Farið nú að hugsa um eitthvað sem skiptir máli, stelpur.“
B: Bjarni Benediktsson forsætisráðherra. Einn tíu þjóðarleiðtoga sem eru í forsvari fyrir HeForShe verkefni UN Women.
C: Hillary Clinton. Eina konan sem hefur verið forsetaframbjóðandi annars af stóru flokkunum í Bandaríkjunum.
D: Druslugangan. Frábært framtak sem hefur vakið athygli á kynferðisofbeldi
E: EM í fótbolta kvenna í Hollandi í sumar. Íslenska landsliðið tekur nú þátt í þriðja sinn.
F: Feðraveldið. Glatað fyrirbæri. Skamm!
G: Glerþakið. Burt með það.
H: Hrútskýringar. Þegar karlar útskýra lífsins gátur fyrir konum til að koma vitinu fyrir þær.
I: Ísland. Hefur mörg ár í röð verið efst á lista World Economic Forum yfir jafnrétti kynjanna.
J: Jafnlaunavottun. Þorsteinn Víglundsson, félags-og jafnréttismálaráðherra hyggst leggja fram frumvarp um jafnlaunavottun.
K: KÞBAVD. Skammstöfun fyrir: konur þurfa bara að vera duglegri (prófið að skipta fyrsta orðinu út fyrir „karlar“ og þá sjáið þið hvað þetta er hallærislegt).
L: Launamunur kynjanna. Óútskýrður launamunur kynjanna er um 8%. Afhverju?
M: Mótmæli. Höldum. Áfram. Að. Mótmæla.
N: Núna er rétti tíminn fyrir femínisma.
O: Ofsafengin viðbrögð. Koma stundum í kjölfar þess að fólk tjáir sig um jafnrétti.
P: Pungur. Utanáliggjandi líffæri. Heyrst hefur að konur skorti það sárlega til að a) fá sömu laun og karlar b) tekið sé jafnmikið mark á þeim og körlum.
Q: Hví er þessi stafur í íslenska stafrófinu?
R: Rauðsokkur. Þær ruddu brautina fyrir femínista 21. aldarinnar.
S: Sambíóin. Bjóða kvenkyns bíógestum upp á dömubindi.
T: Tvöþúsundogsautján. Í ár eru konur 12% stjórnenda 50 stærstu fyrirtækja landsins.
U: Unnur Brá Konráðsdóttir. Gaf barni sínu brjóst í ræðustól Alþingis og minnti þannig á að brjóst eru ekki kynfæri. (Já, það þurfti að minna á það.)
V: Verzlunarskóli Íslands. Þar er eitt öflugasta femínistafélag landsins sem hikar ekki við að hrista upp í hlutunum.
X og Y: Kynlitningarnir. Þið vitið; þessir sem ákveða hvort við fæðumst kven- eða karlkyns.
Z: Zzzzzz... Það sama og stendur hjá bókstafnum Q.
Þ: Þórdís Elva Þorvaldsdóttir. Öflug baráttukona sem er óstöðvandi í að vekja athygli á kynbundnu ofbeldi.
Æ: Æææ .. hættu þessu kerlingarvæli. Sagt í gamla daga við konur þegar þær vildu eitthvað upp á dekk. Heyrist enn.
Ö: Öfgafemínisti. Stundum notað um fólk sem gerir sér grein fyrir því að jafnrétti kynjanna er ekki náð og vill leggja sitt af mörkum til að breyta því. annalilja@mbl.is
Anna Lilja Þórisdóttir