Samgöngustofa metur sem svo að öryggismál hópferðabíla séu heilt yfir í góðu standi. Mikill innflutningur hafi verið á nýjum hópbifreiðum sem bendi til þess að flotinn sé að yngjast og megi ætla að nýjar rútur séu talsvert öruggari en þær eldri.
„Slysatölur sýna að slösuðum í rútum fjölgar og veldur sú fjölgun vissulega áhyggjum en þó er fjölgunin nokkurn veginn í takti við fjölgun ferðamanna og þar með fjölgun rútufarþega,“ segir Gunnar Geir Gunnarsson, deildarstjóri öryggis- og fræðsludeildar Samgöngustofu.
Hann segir Samgöngustofu ekki hafa gögn um bílbeltanotkun í rútum en ljóst sé að hægt sé að auka hana til muna með því að tilkynna farþegum í upphafi ferðar um skyldu þeirra til að spenna beltin.
„Það er reynsla flestra sem hafa upplifað slíkt að mjög margir spenna á sig beltin við að heyra slík skilaboð. Lögum samkvæmt skulu farþegar fá upplýsingar um beltaskyldu frá ökumanni, leiðsögumanni eða með mynd- eða hljóðupptöku og er það því á ábyrgð rekstraraðila hópbifreiðanna og ökumanna þeirra að upplýsa farþega. Samgöngustofa vinnur stöðugt að því að auka beltanotkun almennt og eru rútur þar ekki undanskildar,“ segir Gunnar Geir.
Til baka
Leita í greinasafni
Prenta grein
