Héraðsdómur Reykjavíkur dæmdi í gær Jens Gunnarsson, fyrrverandi lögreglumann hjá fíkniefnadeild lögreglunnar á höfuðborgarsvæðinu, í 15 mánaða óskilorðsbundið fangelsi fyrir spillingu í starfi. Þá var Pétur Axel Pétursson dæmdur í níu mánaða fangelsi, m.a. fyrir að hafa boðið Jens gjafir fyrir aðstoð sína, en Pétur hefur áður hlotið dóm vegna fíkniefnamála.
Jens var ákærður fyrir brot gegn þagnarskyldu í starfi sínu sem lögreglumaður í deild R2, sem einnig var kölluð fíkniefnadeild, og Pétri Axel var gefin að sök hlutdeild í þeim brotum. Í málinu lá fyrir upptaka af samskiptum milli þeirra og endurrit af samtalinu, en Jens braut gegn þagnarskyldu sinni með því að upplýsa Pétur um að hann hefði ekki heyrt minnst á hann í deildinni í einn og hálfan til tvo mánuði og með því að upplýsa að tiltekinn maður væri skráður upplýsingagjafi og að hann væri í upplýsingasambandi við tiltekinn lögreglumann. Þá veitti Jens upplýsingar um innra skipulag lögreglunnar og nöfn lögreglumanna.
Jens var jafnframt ákærður og dæmdur fyrir stórfellda og ítrekaða vanrækslu og hirðuleysi í starfi sínu, með því að varðveita 1,18 grömm af amfetamíni og 10 millilítra af vefaukandi sterum og 20 millilítra af testósterón prípíónati í skrifborðsskúffu á vinnustað sínum. Lyfin hafði Jens fengið afhent vegna starfs síns en ekki gengið frá þeim í samræmi við reglur ríkislögreglustjóra. Hann einnig sakfelldur fyrir að hafa varðveitt tvær loftskammbyssur í skrifborðsskúffu í vinnunni. Vísaði Jens til þess að fleiri haldlagða muni hefði verið að finna í deildinni en hugsanlega hefðu þessi vopn verið notuð til kennslu eða sýninga.
Til baka
Leita í greinasafni
Prenta grein
