Guðmundur Sigurvin Magnússon

Kynni okkar hófust fyrir alvöru 2009, þegar Gummi tók að sér byggingu á fjárhúsi, vélageymslu og síðar viðbyggingu og endurbætur á íbúðarhúsi okkar. Þessar framkvæmdir hafa tekið nokkur ár og því myndast sterk og góð tengsl á milli okkar. Betri og þolinmóðari mann var ekki hægt að fá í þessi verkefni með okkur, óþreytandi að vinna, leiðbeina og líta eftir okkur í þessum framkvæmdum. Nú er komið að leiðarlokum allt of snemma, verkefnalistinn var ekki tæmdur, en nú verðum við að halda áfram án smiðsins okkar, sem verður sárt saknað þegar eitthvað á að framkvæma, einnig komum við til með að sakna þess að smiðurinn renni í hlað í stutt spjall og kannski kaffibolla.

Elsku Gerður, og aðrir aðstandendur okkar innilegustu samúðarkveðjur.

Minning um góðan mann lifir með okkur, með kæru þakklæti fyrir góðar stundir og sanna vináttu.