Alda fæddist á Stóru-Heiði í Mýrdal en flutti 17 ára til Reykjavíkur og átti þar heima til 1973. Þá flutti hún til Kópaskers, bjó þar í 12 ár, síðan í Ólafsvík til 2006 en hefur síðan verið búsett á Akranesi. Á þessari hægfara hringferð um landið hefur Alda lengst af verið upptekin af hjálparstarfi Rauða krossins.
„Þetta hjálparstarf hófst fyrir alvöru á Kópaskeri. Þá var enginn hjúkrunarfræðingur á staðnum en læknir kom í plássið einu sinni í viku. Heilsugæslan þar var í lágmarki en ég starfaði einmitt við heilsugæluna, gerði það sem ég gat og hafði vit á og í mörg horn var að líta með að annast sjúka og aldraða, veita þeim stuðning og aðhlynningu og afgreiða í apótekinu.
Í Ólafsvík var ég svo lengst af forstöðukona dvalarheimilisins Jaðars en vann alltaf með Rauða krossinum og er nú formaður Rauða krossins hér á Akranesi. Og hér er í nógu að snúast. Við erum með opið hús fyrir nýbúa, Barnahóp, einu sinni í viku, Skvísuhóp fyrir konur í hópi nýbúa sem hittast á laugardagsmorgnum og matarkvöld einu sinni í mánuði þar sem boðið eru upp á ljúffenga, framandi rétti, víðs vegar að úr heiminum.
Auk þess höldum við námskeið í skyndihjálp og prjónum og sendum fatapakka, sokka, vettlinga og peysur til Hvíta-Rússlands. Ég hef því engan tíma til að velta fyrir mér eigin aldri. Það er bara heiður og blessun af því að ná góðum aldri og geta látið gott af sér leiða.“
Til baka
Leita í greinasafni
Prenta grein
