„Þetta eru vissulega miklir strókar, en því miður er þetta ekki óalgengt. Ísland er mjög stór uppspretta þegar kemur að sandstormum og teygja þeir sig gjarnan mörg hundruð kílómetra út á haf,“ segir Ingibjörg Jónsdóttir, jarðfræðingur við Háskóla Íslands.
Vísar hún í máli sínu til þess að Geimvísindastofnun Bandaríkjanna, NASA, hefur birt MODIS-mynd, sem tekin var í gær, og sýnir hún meðal annars stóra og mikla sandstróka. Eiga þeir einkum upptök sín á Mýrdalssandi og Meðallandssandi, en einnig úr farvegi Skaftár. Um miðjan dag í gær náðu strókarnir mörg hundruð kílómetra út á Atlantshaf, en að sögn Ingibjargar voru þá kjöraðstæður fyrir myndun þeirra.
„Það eru einkum jökulárnar sem bera með sér fínkornótt set og leir sem kemst svo á flug þegar þornar og blæs. Það þarf oft lítinn vind til að þetta fari allt á hreyfingu, en norðanáttin sér til þess,“ segir Ingibjörg og bætir við að sandstrókurinn, þó honum svipi nokkuð til gosstróks á myndinni, nái sjaldnast mjög mikilli hæð.
Landsins forni fjandi heldur sig fjarri
Þá sýnir myndin einnig hversu lítið fer nú fyrir hafísnum, landsins forna fjanda. „Hann hefur verið ansi lítill í vetur. Apríl hefur nú gjarnan verið sá mánuður sem ísútbreiðsla hefur verið hvað mest, en nú er sagan önnur og ísinn hefur lítið farið inn fyrir miðlínu.“ khj@mbl.is
Til baka
Leita í greinasafni
Prenta grein
