Totti lék í gær sinn síðasta leik fyrir Roma, það félag sem hann hefur leikið fyrir allan sinn feril. Totti hefur leikið í 25 leiktíðir fyrir Roma og á þeim tíma bandað frá sér gylliboðum frá öðrum stórliðum sem borið hafa víurnar í hann.
Slík hollusta er ekki á hverju strái í knattspyrnuheiminum í dag þar sem leikmenn falla hver á eftir öðrum fyrir gylliboðum og kíkja á grænni skóga hjá öðrum liðum. Totti er í guðatölu hjá stuðningsmönnum Roma fyrir frammistöðu sína innan vallar og þá tryggð sem hann hefur haldið við félagið.
Totti hefur átt erfitt uppdráttar á þessu tímabili hjá Roma, en kastast hefur í kekki á milli hans og Luciano Spalletti, þjálfara Roma, og síðasta tímabilið hjá Totti hefur að mörgu leyti einkennst af fregnum af erjum þeirra í milli.
Þegar fram líða stundir munu knattspyrnuáhugamenn þó klárlega minnast Totti fyrir afrek hans á knattspyrnuvellinum, falleg tilþrif hans þar og glæsileg mörk sem hann skoraði. Litríkum og glæstum ferli hans sem leikmaður Roma er nú lokið og spurning hvað tekur við.
Rökrétt framhald á ferli Totti innan knattspyrnunnar væri að hann fúlsaði við fjármunum sem honum munu bjóðast frá Bandaríkjunum, Kína og Austurlöndum og gerðist starfsmaður á skrifstofu Roma.