Stofutónleikaröð Gljúfrasteins hefst að nýju á morgun, 4. júní, kl. 16, en stofutónleikar hafa verið haldnir á Gljúfrasteini frá árinu 2006 á hverjum sunnudegi frá byrjun júní til loka ágúst.
Á fyrstu tónleikunum á morgun, sunnudag, mun Strengjakvartettinn Siggi flytja verk eftir Bach og John Cage. Sigga skipa Una Sveinbjarnardóttir fiðluleikari, Helga Þóra Björgvinsdóttir fiðluleikari, Þórunn Ósk Marinósdóttir víóluleikari og Sigurður Bjarki Gunnarsson sellóleikari.
Á meðal flytjenda á stofutónleikum sumarsins verða Tómas R. Einarsson, Sigríður Thorlacius, Sóley, Bryndís Jakobsdóttir (Dísa), Davíð Þór Jónsson og Elmar Gilbertsson. Dagskrá sumarsins má finna á gljufrasteinn.is.