Auk þeirra eru forsvarsmenn og þjálfarar flestra bestu og stærstu handknattleiksliða Evrópu sem láta sig ekki vanta á úrslitahelgina þótt lið þeirra taki ekki þátta. Helstu landsliðsþjálfarar Evrópu eru einnig viðstaddir, framkvæmdastjórar og formenn handknattleikssambanda. Elítan í evrópskum handknattleik er hér í borginni. Vafalítið er vélað um íþróttina í reykfylltum bakherbergjum.
Um 40.000 manns sækja viðburðinn, sem gerir hann að einum fjölmennasta innanhúss íþróttaviðburði í Evrópu ár hvert.
Aðeins einn Íslendingur stendur í eldlínunni á leikvellinum að þessu sinni, Aron Pálmarsson, með ungverska meistaraliðinu Veszprém. Liðið freistar þess að vinna eina titilinn sem það hefur ekki unnið og reyndar mátt sætta sig við tap í úrslitaleik í síðustu tvö skipti.
Íslendingar hafa alltaf verið fleiri á keppnisvellinum en nú síðan núverandi keppnisfyrirkomulag var tekið upp árið 2010. Hins vegar kemur það ekki í veg fyrir að sennilega hafa aldrei verið fleiri Íslendingar meðal áhorfenda en nú. Menn og konur koma ár eftir ár og nýir bætast í hópinn ár hvert. „Maður ánetjast þessari handboltahátíð við fyrstu heimsókn,“ sagði Íslendingur sem varð á vegi mínum í miðborg Kölnar í gærmorgun. Ég gat ekki mótmælt vegna þess að ég er einn þeirra sem hafa ánetjast.