Donald Trump Bandaríkjaforseti hefur gert margt til þess að hneyksla fólk. Sumt er bara skrýtið, eins og covfefe-málið, en Trump skrifaði þetta sérstaka orð á Twitter og fór fólk að geta í eyðurnar.
Donald Trump Bandaríkjaforseti hefur gert margt til þess að hneyksla fólk. Sumt er bara skrýtið, eins og covfefe-málið, en Trump skrifaði þetta sérstaka orð á Twitter og fór fólk að geta í eyðurnar. Annað sem hann gerir er öllu verra, eins og að draga Bandaríkin út úr Parísarsamkomulaginu, sem þótti tímamótasamkomulag. Öll jörðin er í hættu og þar á meðal Ísland.
Þekktar byggingar víðs vegar um heiminn hafa verið lýstar upp með grænu ljósi til að mótmæla þessari ákvörðun og sýna grænni framtíð stuðning. Þeirra á meðal eru ráðhúsin í New York, Washington DC og París. Þetta eru táknræn mótmæli sem eru samt áhrifarík, en myndirnar af fjölmörgum grænum byggingum hefur verið deilt víða á samfélagsmiðlum.
Fólk stendur því þétt saman í mótmælum sínum gegn Trump en grínistinn Kathy Griffin virðist hafa gengið of langt að mati margra. Hún birti mynd af sér með blóðugt höfuð er líktist Bandaríkjaforseta. Myndin var gerð í samvinnu við ljósmyndarann Tyler Shields og átti að ýta við bandarískum almenningi.
Fyrir þetta hefur hún hlotið heilmikla gagnrýni og tapað stuðningi margra fyrrverandi og núverandi samstarfsaðila, þar á meðal CNN og Squatty Potty, sem ætlaði að nota Griffin í auglýsingaherferð.
Einn maður hefur þó staðið upp til varnar Griffin og það er Jim Carrey. „Mér finnst starf grínistans felast í því að fara alltaf yfir strikið því strikið er ekki til í alvöru,“ sagði Carrey við Entertainment Tonight og sagði grínista vera „síðustu varnarlínuna“ gegn Trump.