Fjármálaráðherra er afskaplega stoltur af því að hafa varpað fram spurningunni „Má fjármálaráðherra hafna krónunni?“ og að hafa svarað henni játandi. Þeir sem til þekkja í efnahagsmálum hafa ekki fagnað útspili ráðherrans. Viðskiptablaðið segir til dæmis í vikunni í pistlinum Tý að fjármálaráðherra megi ekki „hafna lögeyri landsins sisvona“.
Í sama blað ritar Ragnar Árnason, prófessor í hagfræði, grein um þetta mál undir yfirskriftinni „Misskilningur um krónuna leiðréttur“.
Þar segir: „Baráttumenn fyrir því að leggja íslensku krónuna niður byggja mál sitt að verulegu leyti á misskilningi og jafnvel staðleysum. Þeir halda því fram að krónan valdi sveiflum og óstöðugleika í efnahagslífinu. Þeir fullyrða að krónan sé orsökin fyrir hærri vöxtum á Íslandi en í nágrannalöndunum. Hvort tveggja er í grundvallardráttum rangt.“
Ragnar bendir á að íslenskt efnahagslíf sé tiltölulega óstöðugt „fyrst og fremst af tveimur ástæðum: Fyrri ástæðan er að hagkerfið er smátt. Því eru grunnatvinnuvegir fáir og miklu færri en í stærri hagkerfum.“
Síðari ástæðan sé sú að „grunnatvinnuvegir á Íslandi eru í óvenju ríkum mæli byggðir á náttúrugæðum. Náttúran er eðli sínu samkvæmt misgjöful. Það veldur einnig sveiflum í efnahagslífinu.“
Þetta er svo sem ekki mjög flókið, en nógu flókið þó til að fjármálaráðherrann ruglast í ríminu.
Til baka
Leita í greinasafni
Prenta grein
