Á Boðnarmiði birtir Hólmfríður Bjartmarsdóttir þetta haustljóð, sem byrjar svo fallega en fær svo dapurlegan endi og heitir Bergmál: Sól í austri, lýsir lyng í mónum loga birkitré á hvítum grunni.

Á Boðnarmiði birtir Hólmfríður Bjartmarsdóttir þetta haustljóð, sem byrjar svo fallega en fær svo dapurlegan endi og heitir Bergmál:

Sól í austri, lýsir lyng í mónum

loga birkitré á hvítum grunni.

ber orðin hörð og bragðdaufari í munni

brakandi mosinn frosinn undir skónum.

Yfir tún og engi er hvítt að líta

úfið silfurfax á stráum ljómar.

frjósa nú allar fræhirslurnar tómar

fráteknu lömbin hélu stráin bíta.

Maður með vopnin sín á fætur fer

ferðast um skurði hálfboginn í laumi

hermannafötin hefur valið sér

miðar á fugl sem vel í blámann ber

byssan hans vekur mig í hálfum draumi.

Bergmálið hljómar illa, í eyrum mér.

Jón Atli Játvarðarson segir á Boðnarmiði að sér hafi dottið í hug „gamall fyrripartur sem Eysteinn í Skáleyjum var að leika sér með fyrir meira en 30 árum. Hann tengi ég umræðu um sauðfjárvandann í dag. Partinn þann sendi hann inn í vísnaþátt sem Stefán Jóhannesson sá um í NT, ef einhver man eftir því. Mér fannst erfitt að glíma við þann fjanda og þar sem ég var í Skáleyjum á þessum tíma notaði ég aðstöðu mína til að láta Eystein heyra það. Það er ekki nokkur leið að botna þessa endemis vitleysu.

Silfurföt með sauðakjöt

sjást í mötuneyti.

Hvernig í fjandanum botnar þú þetta sjálfur? Eysteinn svaraði:

Silfurföt með sauðakjöt

sjást í mötuneyti.

En kelling sjötug leið og löt

leggur skötu í bleyti.“

Margar skemmtilegar limrur eru eftir Eystein. Hér segir hann „harmsögu að austan“:

Ungmeyja austur í Japan

öslaði hnédjúpan krapann.

Rakst þar á Kana,

hann klóraði hana.

Þá réðst hún á dónann og drap hann.

Og þessi:

Hinn gráðugi Geirþjófur dósent

græddi víst þó nokkur prósent

er seldi hann Merði

á margföldu verði

mölétið Jónsbókarljósprent.

Það mætti segja mér að Pétur Stefánsson hlakkaði til föstudaganna:

Á eftir þegar sól er sest,

sálina fátt mun ergja.

Á föstudögum finnst mér best

að fá mér öl að bergja.

Halldór Blöndal

halldorblondal@simnet.is