Gunnar Hersveinn rithöfundur og Elín Pjetursdóttir heimspekingur ræða um fyrirgefningu út frá mörgum áhugaverðum sjónarhornum í heimspekikaffi kl. 20 í kvöld, miðvikudagskvöld 18. október, í Borgarbókasafninu Gerðubergi.
Í tilkynningu um viðburðinn segir: „Fyrirgefning er mikilvægur mannkostur. Fólki er iðulega ráðlagt að fyrirgefa og þiggja fyrirgefningu annarra. Hún er lærð dyggð en jafnframt tilfinning sem þarf að rækta með sér. Fyrirgefning er falleg en kannski ekki alltaf siðferðilega réttmæt.“
Ennfremur segir að fyrirgefning hafi fengið mikla athygli undanfarin ár og spyrja megi margra spurninga um fyrirgefningu. Til dæmis hvort hún sé dyggð sem ávallt er góð? Hvort alltaf sé siðferðilega rétt að fyrirgefa eða hvort stundum sé kannski beinlínis rangt að fyrirgefa? Svo megi velta upp hvort fyrirgefningin sé háð menningu og lífsskoðunum og ýmsu öðru.
Heimspekikaffið í Gerðubergi hefur ekki að ósekju verið vinsælt undanfarin misseri, því þar er fjallað á mannamáli um hvers konar líferni er eftirsóknarvert. Gestir taka virkan þátt í umræðum og þykir mörgum þeir hafa fengið gott veganesti eftir kvöldin og margvísleg efni til að ræða frekar.
Gunnar Hersveinn hefur umsjón með heimspekikaffinu og leiðir gesti í lifandi umræðu um málefnin. Hann hefur m.a. skrifað bókina Gæfuspor – gildin í lífinu. Elín Pjetursdóttir er með MA-próf í heimspeki og hefur m.a. rannsakað fyrirgefningu og hatur. Allir eru velkomnir og aðgangur er ókeypis.
Til baka
Leita í greinasafni
Prenta grein
