Gátan er sem endranær eftir Guðmund Arnfinnsson:
Gista þarna glæponar.
Gjarnan sest í hlandkoppinn.
Skeytt við nafn hans Völu var.
Við hann bind ég Grána minn.
Guðrún Bjarnadóttir svarar;
Ég kastaði krimma í steininn.
Í koppum þar hlandsteinninn myndast.
Með steinvölu lukust upp leynin.
Ég lét skúrk við hestastein bindast.
Þessi er lausn Helga R. Einarssonar:
Við hland- og Völu- og hesta- skeytt.
Hættulegir gista þar.
Ég stend á því, hér stenst bara' eitt.
Steinninn hæfir alls staðar.
Harpa á Hjarðarfelli sendi ekki lausn við síðustu gátum og gefur þessa skýringu:
Ég ekki gátum yfir sat
og engu frá mér skilaði.
Það hefur verið ógnar at
og internetið bilaði.
En hér kemur hún með lausn á gátu dagsins:
Steininn gista glæponar.
Gulur steinn í kopp.
Eru steinar allskonar.
Og við stein er stopp.
Sjálfur skýrir Guðmundur gátuna þannig:
Í steini gista glæponar.
Gjarnan í kopp sest hlandsteinninn.
Til Völu-Steins ég vísa þar.
Við stein bind ég Grána minn.
Þá er limra:
Hann Tómas með tignarlegt fasið
tæmdi síðasta glasið
og gekk svo í stúku
ásamt Steini frá Klúku,
en Steinn var kominn í grasið.
Og loks ný gáta eftir Guðmund:
Næturskýin hurfu hratt,
hressum eftir morgunbað
hitt og þetta í hug mér datt,
hér er gáta sett á blað:
Hann er gróðurgeiri í fjalli.
Golfleikur hefst á þeim stalli.
Dagslátta á túni talinn.
Telst líka nýsleginn balinn.
Vetur konungur bankar á dyrnar hjá hagyrðingum. Ármann Þorgrímsson brást skjótt við:
Er nú tíðin orðin hörð,
okkur fátt til varnar,
skítaveður skekur jörð,
skjálfa kerlingarnar.
Og síðan Ingólfur Ómar:
Vetrar gjalla veður stríð,
viknar fjallahringur.
Þekur stalla, holt og hlíð
hvítur mjallarbingur.
Halldór Blöndal
halldorblondal@simnet.is