Baldur Arnarson
baldura@mbl.is
Eigendur fasteignaþróunarfélagsins Mannverks hafa keypt fjölda fasteigna í Reykjavík undir gististarfsemi. Félagið starfar náið með Ólafi Ólafssyni, sem gjarnan er kenndur við Samskip. Það samstarf nær m.a. til tveggja fyrirhugaðra hótela á Tryggvagötu og Héðinsreit. Fyrrnefnda hótelið verður opnað á næsta ári en óvíst er hvenær uppbygging á Héðinsreit hefst. Á vef Festis segir að félagið Ívarssel hafi verið stofnað um uppbygginguna. Það sé í eigu Festis og Mannverks.
Festir, félag Ólafs og konu hans, Ingibjargar Kristjánsdóttur, er að breyta Suðurlandsbraut 18 í hótel. Þá kom fram í fjölmiðlum í haust að Festir undirbýr 150 herbergja hótel á landi Eiðhúsa á Snæfellsnesi. Þá má nefna að Festir hyggst byggja íbúðir á Gelgjutanga í Reykjavík.
Mannverk er í eigu framkvæmdastjóra félagsins, Hjalta Gylfasonar, og Jónasar Más Gunnarssonar.
Kostaði um 800 milljónir
Þeir eru skráðir fyrir 90% hlut í félaginu Laugavegi 56 ehf. í gegnum félagið Laxamýri. Skv. ársreikningi Laugavegar 56 ehf. 2016 keypti félagið það ár byggingu, fasteign, lóð og byggingarrétt á Barónsstíg 28, Hverfisgötu 98a, 100 og 100a, Skúlagötu 40a og Njálsgötu 64. Fyrir átti félagið húseignina Laugaveg 145. Heildarkaupverð þessara eigna var sagt nema 798,5 milljónum króna.Dótturfélag Laugavegar 56 ehf., X-459 ehf., á 47 íbúðir á Lindargötu 34-36. Þær eru leigðar út af Reykjavík Apartments, sem er í 10% eigu Roots Iceland og starfsmanna. Roots Iceland er með sama lögheimili og Mannverk. Eigendur 90% hlutar í Reykjavík Apartments og Roots Iceland eru óskráðir hjá Creditinfo. Reykjavík Apartments er með hótelíbúðir á Barónsstíg 28. Laugavegur 56 ehf. á Njálsgötu 64 við hliðina.
Fram kemur á vef Mannverks að félagið undirbúi framkvæmdir við byggingu 12 hótelíbúða á Laugavegi 56 fyrir Reykjavík Apartments.
Á Hverfisgötu 100a og Skúlagötu 40a var félagið Local Apartments Reykjavík með hótelíbúðir. Laugavegur 56 ehf. hefur keypt þessar eignir og tvö samliggjandi hús á Hverfisgötu. Þá er Laugavegur 56 ehf. að breyta Laugavegi 143 og 145 og fjölga íbúðum. Félagið á nr. 145.