Tungumál í hættu og aðgerðir til varðveislu þeirra verður umfjöllunarefni tveggja stuttra erinda á ensku í fyrirlestrarsal Veraldar - húss Vigdísar kl. 12 í dag, föstudaginn 8. desember. Erindin flytja Sebastian Drude, forstöðumaður Alþjóðlegu tungumálamiðstöðvarinnar við Háskóla Íslands, og Suzanne Gessner, málvísindamaður frá Kanada.
Talið er að allt að 90% af fjölbreytni tungumála heimsins muni glatast hjá næstu fimm til sex kynslóðum. Í erindi sínu fer Drude yfir rætur og þróun í skráningu, varðveislu tungumála og stöðu mála í dag. Gessner, sem er aðgerðasinni og málvísindamaður við háskólann í Bresku Kólumbíu, fjallar um fjölbreytni tungumála þar í landi, en í Bresku Kólumbíu eru töluð 34 frumbyggjamál.
Fyrirlestrarnir eru hluti af málvísindakaffi Íslenska málfræðifélagsins og Málvísindastofnunar HÍ.