Hjálmar Freysteinsson yrkir um „áhættuhegðun“:
Fádæma slunginn og sleipur
við slúðurburð þótti Greipur,
sem varð úti með tík
sinni í Tólfskerjavík
en þangað fór hann með fleipur.
Ríkisstjórninni hefur verið vel tekið. Davíð Hjálmar Haraldsson flettir upp í „GRIMMS-ÆVINTÝRUM SÍÐARI“:
Rauðhetta, lagleg og ljúf,
er lítil svo minnir á Stúf.
Annað samt óttast þarf meir:
Úlfarnir fylgj' enni tveir.
Hallmundur Kristinsson segir:
Ég til að byrja með hrifningu hem,
þótt hafi ég ekki misst trúna
á stóra fólkinu og stubbunum þrem
sem stjórna landinu núna.
„Ný ríkisstjórn vinsæl, segir RÚV“ er yfirskriftin á vísu Halldórs Guðlaugssonar:
Jólasveinar ganga um gólf,
gæðingar í skötulíki,
ellefu talsins, ekki tólf,
eru þeir í Köturíki.
Arnþór Helgason gerði á þriðjudag athugasemd við það á Boðnarmiði að Veðurstofan skyldi halda því fram að í Reykjavík væri logn. – „Hér í dreifbýlinu á Seltjarnarnesi er stinningskaldi af norðaustri,“ bætti hann við:
Nú er úti ærið kalt,
engu stormur þyrmir –
borgargötum gefið salt
sem glæru yfir hilmir.
Ingólfur Ómar Ármannsson horfði til himins:
Læðist húm um land og ver
lít ég myrkan heiminn.
Skarður máni fölur fer
ferða sinna um geiminn.
Bjarni Gunnlaugur Bjarnason var á svipuðum nótum:
Enn er máninn ekki fallinn
uppi fullur hangir þó
að hafi í tungli kannski karlinn
af kendiríi fengið nóg
Það var bjart veður á þriðjudag og fjallasýn. Jón Valur Jensson orti:
Falleg er sú fjallasýn,
finnst ei betra á jörðu neitt.
Jú, vera má, að enn sé eitt
öllu fegra: börnin mín
og allt það líf sem Guð oss gefur
og gæsku sinni æ umvefur.
„Hnoð dagsins segir frá að ekki fer alltaf allt sem til er sáð,“ segir Hallmundur Guðmundsson:
Reigður líkt og hani á haug
horfð' ann yfir sviðið.
Úr lúkum honum lukkan smaug,
læst var Gullna hliðið.
Halldór Blöndal
halldorblondal@simnet.is