Ræktar garðinn sinn eins og Birtingur

Þuríður fæddist í Reykjavík 8.1. 1948 og ólst þar upp. Hún lauk prófi frá Hjúkrunarskóla Íslands 1973, stundaði framhaldsnám í hand- og lyflækningahjúkrun 1983 og lauk diplómaprófi frá Norræna heilbrigðisháskólanum 1992. Hún var í varastjórn og stjórn HFÍ 1973-78, kjararáði HFÍ og fræðslunefnd BSRB 1976-79.

Þuríður var hjúkrunarfræðingur og deildarstjóri á Borgarspítalanum 1973-80, hjúkrunarfræðingur við Heilsuverndarstöðina í Reykjavík og Heilsugæslustöðina Asparfelli 1980-82 og við Sjúkrahúsið á Egilsstöðum 1983-85. Hún var hjúkrunarforstjóri Heilsugæslustöðvarinnar á Egilsstöðum 1985-88, hjúkrunarfræðingur þar 1988-90, fræðslufulltrúi Krabbameinsfélags Íslands 1990-96 og hjúkrunarfræðingur við Heilsugæslustöðina á Egilsstöðum og Heilbrigðisstofnun Austurlands 1994-99.

Þuríður sat í bæjarstjórn Egilsstaða 1990-98, var forseti bæjarstjórnar 1994-98, var varaþingmaður fyrir Alþýðubandalagið 1992-98, þingmaður Vinstrihreyfingarinnar - græns framboðs á Austurlandi 1999-2003, og þingismaður NA-kjördæmis fyrir VG 2003-2013, var þingflokksformaður VG 2011, sat í heilbrigðis- og trygginganefnd, landbúnaðarnefnd, heilbrigðisnefnd og var formaður hennar 2009-2011, sat í félags- og tryggingamálanefnd, menntamálanefnd, fjárlaganefnd, umhverfisnefnd, þingskapanefnd, allsherjar- og menntamálanefnd, umhverfis- og samgöngunefnd, velferðarnefnd, utanríkismálanefnd, sat í Íslandsdeild Alþjóðaþingmannasambandsins og var formaður hennar 2009-2013, sat í Íslandsdeild Evrópuráðsþingsins og var formaður hennar 2011-2013.

Þuríður var formaður Krabbameinsfélags Héraðssvæðis 1986-2000, sat í Ferðamálaráði 1989-93, var varamaður í Tryggingaráði 1995-99, sat í stjórn Listskreytingasjóðs 1997-99, í tóbaksvarnanefnd 1997-99, í stjórn Krabbameinsfélags Íslands 1997-99, í verkefnisstjórn Staðardagskrár 21 1998-2000, í Þingvallanefnd 2010 og 2011-2013 og var formaður Garðyrkjufélags Íslands 2013-2017.

Þuríður og Björn, eiginmaður hennar, fluttu að austan er hún lét af þingmennsku 2013: „Þá keyptum við hús með stórri lóð í Kópavogi en þar höfum við verið að koma okkur fyrir í rólegheitum og rækta garðinn.“

Þuríður hefur alla tíð haft gaman af ferðalögum og að kynnast nýjum aðstæðum: „Á síðastliðnu hausti var ég í mánuð í Palestínu og vann sem sjálfboðaliði og stuðningsmaður bænda sem búa í nágrenni landtökubyggða eða hernuminna svæða við ólífutínslu. Þessir ólífubændur eiga erfitt með að ná uppskerunni, þar sem þeir verða fyrir stöðugu ónæði og árásum frá landtökubyggðunum, þeir eru frekar látnir í friði við tínsluna ef þeir njóta aðstoðar erlendra sjálfboðaliða, sem taka myndir og semja skýrslur um ólöglegar aðgerðir landtökufólks, lögreglu og herliðs.

Að öðru leyti nýt ég þess að vera komin á eftirlaun og hafa meiri tíma fyrir foreldra mína og fjölskyldu.“

Fjölskylda

Þuríður giftist 6.1. 1973 Birni Kristleifssyni, f. 1.12. 1946, arkitekt. Foreldrar hans voru Kristleifur Jónsson, 18.11. 1898, d. 29.1. 1978, vegaverkstjóri, og Sigríður Þóra Jensdóttir, f. 27.8. 1910, d. 11.7. 1995.

Fyrri sambýlismaður Þuríðar: Bjarni K. Sívertsen, f. 16.11. 1946, tæknifræðingur.

Börn Þuríðar eru: 1) Ragnheiður Sívertsen, f. 28.3.1966, íþróttakennari í Kópavogi en maður hennar er Hilmar Sigurðsson vélstjóri og eru börn þeirra Tinna Björk, f. 23.3. 1992, og Hildur Sif, f. 26.11. 1996; 2) Kristleifur Björnsson, f. 12.11. 1973, myndlistamaður í Reykjavík og er dóttir hans Ronja Þuríður, f. 12.2. 2002, og 3) Þorbjörn Björnsson, f. 28.6. 1978, sviðslistamaður í Berlín.

Bróðir Þuríðar er Jón Rúnar Backman, f. 6.1. 1951, húsasmiður í Garðabæ en kona hans er Þóra Elín Guðjónsdóttir hjúkrunarfræðingur.

Foreldrar Þuríðar eru Ernst Fridolf Backman, f. 21.10. 1920, íþróttakennari, og Ragnheiður Jónsdóttir, f. 10.4. 1928, sjúkraliði.