Íslenskir stjórnmálamenn gera of lítið til að takmarka losun gróðurhúsalofttegunda. Þetta telur meirihluti þeirra sem svöruðu umhverfiskönnun Gallup sem kynnt var á ráðstefnu í gær.
60% svarenda sögðust hafa áhyggjur af þeim afleiðingum sem loftslagsbreytingar gætu haft á þá og fjölskyldur þeirra og 63% sögðust vera þeirrar skoðunar að aukin áhersla á umhverfis- og náttúruvernd mætti ekki bitna á þeim vatnsaflsvirkjunum sem væru starfræktar í dag.
Nýir orkugjafar nauðsyn
Samkvæmt niðurstöðum könnunarinnar voru skiptar skoðanir um hvort skattleggja ætti jarðefnaeldsneyti mun meira en endurnýjanlega orkugjafa.Rúmlega helmingur svarenda taldi Ísland fjárfesta of lítið í þróun á endurnýjanlegum orkugjöfum og áþekkt hlutfall taldi Ísland gera of lítið til að aðlagast loftslagsbreytingum.
Þrír af hverjum fjórum sögðust þeirrar skoðunar að nauðsynlegt væri að taka í notkun nýja orkugjafa ef skapa ætti sjálfbært samfélag hér á landi og sama hlutfall taldi að í því skyni þyrfti að rannsaka betur hvernig hægt væri að aðlagast loftslagsbreytingum.