Katrín Jakobsdóttir var ráðherra í vinstri stjórn Steingríms og Jóhönnu. Sem ráðherra í þeirri ríkisstjórn studdi hún á annað hundrað skattabreytingar stjórnarinnar án þess að gera nokkurn tímann um þær ágreining eða lýsa efasemdum.
Þessar skattabreytingar voru nánast allar til hækkunar skatta, enda hafa skattar aldrei í sögu þjóðarinnar hækkað jafn gegndarlaust og í tíð fyrrnefndrar vinstri stjórnar.
Síðan hafa skattar lítið lækkað og sumir hækkað, meðal annars fjármagnstekjuskatturinn í tíð núverandi ríkisstjórnar.
Niðurstaðan af skattabreytingum síðustu ár er því veruleg hækkun skatta á almenning og fyrirtæki í landinu.
Þetta skýrir án efa þá afstöðu sem Katrín lýsir í viðtali við Viðskiptamoggann í gær. Þar segir hún að koma þurfi á meiri festu í skattamálum því að breytingar hafi verið of miklar.
Ná þurfi sem mestri sátt um skattabreytingar og „opna skattaumræðuna meira gagnvart almenningi og atvinnulífinu“.
Í tíð vinstri stjórnarinnar þurfti enga sátt og ekkert samráð um skattabreytingar; þær voru keyrðar í gegn með offorsi. Nú, þegar atvinnulíf og almenningur eru að sligast undan skattahækkunum vinstri stjórnarinnar, er ekki hægt að lækka skatta. En nú þarf að ræða málin til að sleppa við að gera nokkuð.
Til baka
Leita í greinasafni
Prenta grein
