„Þessi lægð ætlar að vera þrálát,“ segir Helga Ívarsdóttir, veðurfræðingur hjá Veðurstofu Íslands. Veðurstofan spáir versnandi veðri nú í morgunsárið með norðvestan hvassviðri eða stormi og snjókomu norðan- og vestanlands, fyrst á Vestfjörðum. Á þessum slóðum má búast við mjög lélegu skyggni á köflum og er fólki ráðlagt að sýna aðgát og fylgjast vel með spám og færð. Óvissustig vegna snjóflóða var enn í gildi á norðanverðum Vestfjörðum í gærkvöld.
Helga veðurfræðingur sagði í samtali við mbl.is í gær að þetta slæma veður næði að líkindum inn á höfuðborgarsvæðið. Líklega yrði veðrið verst þar síðdegis, milli klukkan 14 og 16. „Það gæti skollið á með hvassri norðvestanátt og ofankomu. En þetta ætti ekki að standa lengi yfir,“ segir Helga.
Á Suður- og Austurlandi verði að mestu þurrt. Veðrið mun svo ganga niður er líður á daginn, fyrst vestantil á landinu.