Hlutverk Hönnunarsafns Íslands er að safna og varðveita þann þátt íslenskrar menningar sem lýtur að hönnun, einkum frá aldamótunum 1900 til samtímans. Safnið á og geymir um 900 íslenska og erlenda muni, sem margir hafa mikla menningarsögulega þýðingu. Safnkosturinn fer sístækkandi, enda æ fleiri hönnuðir sem hasla sér völl og koma fram með vandaða gripi sem standast alþjóðlegan samanburð og eru hvort tveggja nytjamunir og/eða skrautmunir.
Í safnkostinum er sófasett hannað af Gunnari Magnússyni árið 1962 skráð með eftirfarandi hætti:
Sófasett
Gunnar Magnússon (1933)
Inka-sófasett, 1962
Eik, ull
Nývirki
Gjöf: Helga og Ólafur Ögmundarbörn. Úr dánarbúi hjónanna Rögnu Ólafsdóttur og Ögmundar Helgasonar, 2011.
Inka-sófasett með íslensku ullaráklæði, ekki upprunalegu, og grind úr eik. Inka-húsgagnalínan var fyrst framleidd hjá danska fyrirtækinu Skalma en Gunnar hafði þá lokið námi í Danmörku og var farinn að vinna fyrir dönsk fyrirtæki. Línan var fyrst sýnd á Fredericia-húsgagnasýningunni vorið 1962. Nývirki framleiddi húsgögnin fyrir íslenskan markað, aðallega úr furu með íslensku ullaráklæði. Húsgögnin voru framleidd með sjáanlegum koparskrúfum í grindinni (síðar svörtum innfelldum skrúfum) og voru á tímabili nefnd Prima. Inka-stóllinn hlaut viðurkenningu Iceland Review árið 1968 þar sem hann var sýndur á sýningu Félags íslenskra húsgagnaarkitekta. Inka-settið var einnig sýnt á Húsgagnavikunni í Laugardalshöll árið 1969.