Haukur Helgi Pálsson verður meðal þeirra sem fá að láta ljós sitt skína í Leiðtogabikarnum (e. Leaders Cup) sem er einn af aðalviðburðum hvers tímabils í franska körfuboltanum.
Í Leiðtogabikarnum taka þátt þau átta lið sem efst eru í frönsku A-deildinni þegar keppnistímabilið er hálfnað. Cholet, lið Hauks, náði óvænt inn í keppnina með því að vinna þrjá síðustu leiki og er liðið í 8. sæti, einum sigri fyrir ofan þrjú næstu lið. Talsvert er gert úr Leiðtogabikarnum sem leikinn er í Disneylandi í París, með útsláttarfyrirkomulagi, en sigurvegarinn má taka þátt í Áskorendabikar Evrópu á næstu leiktíð. Mónakó hefur unnið bikarinn tvö síðustu ár.
Dregið verður í 8-liða úrslit næsta fimmtudag. Cholet er í neðri styrkleikaflokki og gæti mætt Monaco, Le Mans, Limoges eða Strasbourg. Keppnin fer fram dagana 16.-18. febrúar.
Haukur skoraði 11 stig og gaf 5 stoðsendingar í sigri á Boulazac, 91:67, um helgina . sindris@mbl.is
Til baka
Leita í greinasafni
Prenta grein
