Jóhanna Sigríður Árnadóttir

Elsku amma/langamma okkar, við kveðjum þig með miklum söknuði og trúum því að nú líði þér betur og sért komin til afa og mömmu.

Ég man hvað þér fannst gaman að ferðast um landið og um heiminn og kallaðir það alltaf siglingar þó svo við hefðum farið fljúgandi. Við ferðuðumst til Spánar, Gíbraltar, Afríku og fleiri staða. Þú elskaðir að fara í ferðir með Húsbílafélaginu á Kjúklingnum með afa og Bjössa og svo fóruð þið öll saman ásamt Árnýju og Jóa með Norrænu og ferðuðust þið um Norðurlöndin.

Við fórum oft saman í Þórsmörk með starfsfélögum frá Hreyfli og þar var oft glatt á hjalla, mikið sungið við varðeldinn og farið í leiki.

Þú elskaðir að baka og það var alltaf til nóg af kræsingum þegar maður kom í heimsókn til þín, kleinur og ástapungar voru alltaf til, enginn fór svangur frá þér.

Við áttum margar góðar stundir saman í skúrnum þegar Litla bílastöðin var til, mikið brallað og spjallað saman.

Það var svo gaman á jólunum þegar við vorum yngri því þá hittumst við öll saman hjá ykkur afa og Bjössa, borðuðum öll saman og opnuðum pakkana og þú varst alltaf svo glöð og líka smá stríðni í þér líka því þú varst alveg með húmorinn í lagi.Þú elskaðir að prjóna á okkur ullarsokka og vettlinga og okkur fannst svo flott að eiga sokka og vettlinga eftir þig.

Við minnumst þín með miklum söknuði og með mikilli þökk fyrir allt sem þú hefur kennt okkur um ævina og við munum öll sakna þín mikið, en vitum að afi og mamma taka glöð á móti þér og að þið munið fylgjast með okkur.

Við erum þakklát fyrir þann tíma sem við áttum með þér og góðar minningar um skemmtilegar samverustundir munu ávallt fylgja okkur.

Elsku Bjössi og Árný, megi góður Guð styrkja ykkur í þessari miklu sorg okkar.

Minning um yndislega ömmu mun lifa í hjarta okkar alla ævi.

Hvíldu í friði.

Þín dótturdóttir,

Það er svo margs að minnast, við vorum alltaf svo góðar vinkonur.

Á unglingsárum mínum var ég mikið hjá ykkur afa og Bjössa og fékk mjög oft að gista og man ég vel eftir þegar þú varst að finna til náttföt og sokka til að sofa í að oft var þetta einhverjum númerum of stórt og sokkarnir náðu upp að hnjám. Oft vorum við Bjössi í vatnsrúminu og auðvitað Tinna með okkur að horfa á mynd og ansi oft sofnaði ég og þú leyfðir mér bara að vera og sváfum við þrjú saman í rúminu, en svo fékk ég oft að skríða upp í hjá þér og afa á morgnana.

Alltaf var kvöldsnarl hjá þér og alltaf til nóg af kræsingum því þú varst alltaf bakandi og var mikill gestagangur hjá þér, ekki var það nú leiðinlegt að fá að hjálpa þér í bakstrinum og oftast voru það kleinurnar og ástapungarnir og svo smákökurnar fyrir jólin.

Elsku amma, nú ert þú komin á betri stað og er ég viss um að mamma og afi hafa tekið vel á móti þér. Þín verður sárt saknað en minningin um þig mun lifa.