Aðalsteinn Ingólfsson listfræðingur á 70 ára afmæli í dag. Spurður um það sem hann hefði helst fyrir stafni þessa dagana svaraði Aðalsteinn: „Ætli ég brenni ekki enn fyrir því sama sem ég gerði fyrir rúmlega fjörutíu árum, sögu íslenskrar myndlistar. Ég er að kenna listfræði uppi í Háskóla Íslands í dag og að því loknu held ég áfram að berja saman grein um íslenska listakonu fyrir tímaritið Skírni í kompu minni heima. Á morgun og um helgina er ég með leiðsögn um sýningar í Reykjavík og Listasafni Reykjaness, og í næstu viku er sömuleiðis fullt prógramm, m.a. fundir í tengslum við bækur um íslenska myndlist og menningarferð til Lissabon.“
Hvað hefur afmælisbarnið sér til afþreyingar þess utan?“ Veturnir fara mikið í útivist ýmiss konar, með og án hunda, bóklestur, eltingaleik við góða tónlist, matargerð og í seinni tíð margs konar barnabarnastúss, sem er kannski það skemmtilegasta af þessu öllu. Á sumrin leggst ég í skreppitúra til afskekktra staða og útlanda og meiri útivist, þ.ám. fluguveiði.“
Og í tilefni dagsins? „Ég var að vona að ég kæmist klakklaust frá þessum degi, en fjölskyldan hafði aðrar hugmyndir. Í kvöld borða ég með fjölskyldu minni á valinkunnu indversku veitingahúsi hér í bæ, en indverskur matur er með því allra besta sem við þekkjum.“
Eiginkona Aðalsteins er Janet S. Ingólfsson, börn þeirra eru Elva Brá, Signý og Drífa og barnabörnin eru orðin sjö.
Til baka
Leita í greinasafni
Prenta grein
