Þríeykið Andrea Ágústa Aðalsteinsdóttir, Freyja Eilíf og Sigthora Odins kalla sig myndlistarkvendi, en þær opna samsýningu í dag, miðvikudag, undir heitinu COMPUTER SPIRIT.
Á sýningunni eru gestir boðnir velkomnir inn í veröld óséðra tengsla milli tölvunnar og mannsins, að hliði sýndarveruleikans þar sem dreginn er fram rafmagnaður andi andans, íklæddur holdi af innra hugbúnaði. Þetta kemur fram í tilkynningu sem og að á sýningunni sé heimur tölvunnar meðal annars rannsakaður með aðferðum andlegra vísinda og meðvitund hennar efnisgerð með tækjum og tólum myndlistarinnar. Gestum stendur einnig til boða að fylgja hugleiðslu inn á stafrænar víddir sem og upplifa verk sem má skilgreina sem atburði, ýmist í efnivið eða rými.
Myndlistarkvendin ætla að opna sýninguna Computer spirit í dag kl. 18-21, á tveimur stöðum, annars vegar í Ekkisens (Bergstaðastræti 25B) og hins vegar í Gallery Port (Laugavegi 23B). Allir velkomnir.