Að sögn Þorsteins Arnar Guðmundssonar, framkvæmdastjóra Meet in Reykjavík, eru straumhvörf að verða í arðsemi fyrirtækja í ferðaþjónustu. „Ef eitthvað þarf að vera áberandi umræðuefni í samfélaginu þá er það þetta, enda stendur ferðaþjónustan undir 43% af okkar útflutningstekjum,“ segir Þorsteinn í samtali við ViðskiptaMoggann.
Hann segir að eitt af því sem hægt sé að gera til að spyrna við fótum sé að auka vægi svokallaðra MICE-ferðamanna til landsins en það eru ferðamenn sem koma til að taka þátt í ráðstefnum, fundum, hvataferðum eða sýningum. „Þeir geta haft töluvert vægi í því að auka arðsemi í íslenskri ferðaþjónustu.“
Þorsteinn bendir á að ef hlutfall MICE-ferðamanna ykist um eitt prósentustig miðað við 2,5 milljón ferðamenn, eins og spár gera ráð fyrir árið 2018, þýddi það 3,5 milljarða í auknum útflutningstekjum.
Undanfarin ár hefur, að sögn Þorsteins, gengið vel að fjölga MICE-ferðamönnum hér á landi eða um 15,1% að meðaltali á ári á tímabilinu 2011-2016. „Hlutfall MICE-ferðamanna er rúmlega 6% af heildarfjölda ferðamanna hér á landi en í þeim löndum sem mestum árangri hafa náð er algengt að hlutfallið sé á bilinu 15-20%,“ segir Þorsteinn.
Hann segir að verðmætin í þessari tegund ferðamanna felist einnig í bættri nýtingu innviða, svo sem hótelum, funda- og ráðstefnurýmum, og jákvæðum árstíðahalla en 80% MICE-gesta komi til landsins utan skilgreinds háannatíma.
Þorsteinn segir að það sama sé að gerast hér á landi og gerðist í Kosta Ríka og Nýja Sjálandi þar sem tekjuaukning af ferðamennsku fór minnkandi á sama tíma og ferðamönnum fjölgaði. „Þróunin hefur verið í ranga átt.“