Mókrókar Reykvíkingarnir Þorkell Ragnar Grétarsson, Benjamín Gísli Einarsson og Þórir Hólm Jónsson skipa hljómsveitina Mókróka. Í lýsingu á hljómsveitinni segja þeir að hljómsveitin hafi orðið til í kjölfar þess að þeir spiluðu gömlu dansana á skemmtifundi Félags íslenskra harmonikkuunnenda. Í framhaldinu hafi þeir svo snúið sér að spunarokki. Þorkell, sem er 21 árs, leikur á rafmagnsgítar, Benjamín, sem er líka 21árs, leikur á hljómborð og Þórir, sem er 24 ára, leikur á trommur.
Mókrókar Reykvíkingarnir Þorkell Ragnar Grétarsson, Benjamín Gísli Einarsson og Þórir Hólm Jónsson skipa hljómsveitina Mókróka. Í lýsingu á hljómsveitinni segja þeir að hljómsveitin hafi orðið til í kjölfar þess að þeir spiluðu gömlu dansana á skemmtifundi Félags íslenskra harmonikkuunnenda. Í framhaldinu hafi þeir svo snúið sér að spunarokki. Þorkell, sem er 21 árs, leikur á rafmagnsgítar, Benjamín, sem er líka 21árs, leikur á hljómborð og Þórir, sem er 24 ára, leikur á trommur.
Umbra Hljómsveitin Umbra hefur nafn sitt af skugga, sem nefnist svo á latínu. Sveitina skipa þrír fimmtán ára Hagskælingar, þær Eir Ólafsdóttir, Eyrún Úa Þorbjörnsdóttir og Nína Solveig Andersen. Eir spilar á selló og syngur, Nína á hljómborð, fiðlu, bassa og annars óskýrt þrumutæki og Eyrún á flautu, bassa og klukkuspil. Þær eru allar úr Reykjavík.
Ateria Ása og Eir Ólafsdætur og Fönn Fannardóttir skipa hljómsveitina Ateria. Ása, sem er 17 ára, spilar á gítar og syngur, Eir, sem er 16 árar, spilar á bassa og selló og syngur, og Fönn, sem er 13 ára, spilar á trommur. Hljómsveitin var stofnuð haustið 2017 og æfir í bílskúr í Vesturbæ Reykjavíkur.
Bjartr Dagbjartur Daði Jónsson, sem notar listamannnafnið Bjartr, tók einnig þátt í síðustu Músíktilraunum og komst þá í úrslit. Hann er tvítugur og hefur búið lungann úr ævinni í Skerjafirði. Hann segist hafa byrjað að leika sér í tónlist árið 2014 þegar hann fór að gera takta á tölvuna og fór síðan að rappa og syngja.
Melophobia Hljómsveitin Melophobia var stofnuð árið 2012 í bílskúr í Stykkishólmi. Hún kemur nú fram á Músíktilraunim í fjórða sinn, keppti fyrst sem OAS árið 2013, en 2014 og 2016 keppti hún undir nafninu BadNews. Sveitina skipa Hlöðver Smári Oddsson, söngvari og gítarleikari, Friðrik Örn Sigþórsson, bassaleikari og söngvari, Jón Glúmur gítarleikari, og Hinrik Þór Þórisson trommuleikari. Þeir eru allir um tvítugt og spila háskólarokk.
Madre Mia Vinkonurnar í Madre Mia eru fjórtán og fimmtán ára, búa á Akranesi og spila indískotið popp. Þær heita Katrín Lea Daðadóttir, sem syngur og leikur á bassa og kassatrommu, Hekla María Arnardóttir, sem syngur og leikur á gítar, og Sigríður Sól Þórarinsdóttir, sem syngur og leikur á hljómborð. Þær hafa allar sterkan grunn í tónlist eftir að hafa verið lengi í Tónlistarskólanum á Akranesi og tvær þeirra hafa unnið Hátónsbarkakeppni grunnskólanna á Akranesi og komist inn á Söngvakeppni Samvest.
Dúettinn Trapísa Hákon Hjaltalín og Karl Hjaltason reka saman tvíeyki sem þeir nefna Dúettinn Trapísu. Þeir skipta svo með sér verkum að Hákon, sem er 18 ára, leikur á rafgítar, en Karl, sem er 24 ára, syngur og leikur á gítar. Þeir kynntust í samspili í tilraunaáfanga í Fjölbrautaskólanum í Breiðholti og hafa áhuga á fjölbreyttri tónlist.
Morii er framhleypin reykvísk rokkhljómsveit með áhrifum úr poppi og þungarokki. Sveitina skipa Ásþór Bjarni Guðmundsson bassaleikari, Fannar Pálsson, gítar- og hljómborðsleikari, Kristján Jónsson trommuleikari og Bjarni Þorgeir Bjarnason söngvari. Þeir eru á aldrinum 21 til 22 ára.
[ Smellið til að sjá stærri mynd ]
Árni Matthíasson arnim@mbl.is Hljómsveitakeppnin Músíktilraunir hefst í Hörpu á sunnudagskvöld. Þetta er í 36. sinn sem keppnin er haldin.

Árni Matthíasson

arnim@mbl.is

Hljómsveitakeppnin Músíktilraunir hefst í Hörpu á sunnudagskvöld. Þetta er í 36. sinn sem keppnin er haldin.

Að þessu sinni tekur 31 hljómsveit þátt í keppninni, en keppt er á fjórum kvöldum, á sunnudagskvöld, mánudagskvöld, þriðjudagskvöld og miðvikudagskvöld. Keppnin hefst kl. 19.30 hvert kvöld. Úrslitin verða síðan haldin laugardaginn 24. mars.

Óvenjumargar stúlkur eru í hljómsveitunum sem keppa þetta árið, 23 af 90 keppendum, en tónlistin er líka óvenjufjölbreytt: rapp, lagrænt popp, klassískt pönk, háskólarokk, lo-fi folk, spunatónlist, rokk, ljóðræna, fönk, rokkað popp, tilraunatónlist og hugvíkkandi hljóðheimur.

Músíktilraunir voru fyrst haldnar í félagsmiðstöðinni Tónabæ í nóvember 1982 og eru nú haldnar í 36. sinn. Helstu verðlaun í tilraununum eru hljóðverstímar að vanda, en einnig eru veitt ýmis verðlaun fyrir hljóðfæraslátt og yrkingar.

Í undanúrslitum velur salur eina hljómsveit en dómnefnd aðra. Dómnefndin er skipuð yfirrituðum, Árna Matthíassyni, og þeim Arnari Eggerti Thoroddsen, Ásu Dýradóttur, Gunnari Gunnarssyni, Hildi Guðnýju Þórhallsdóttur, Kristjáni Kristjánssyni og Ragnheiði Eiríksdóttur.

Hér til hliðar eru kynntar nokkrar hljómsveitir frá kvöldunum fjórum en sveitirnar verða kynntar á mbl.is og í Morgunblaðinu hvern keppnisdag.