Heimsókn Hvati, Hilmar Björnsson, íþróttastjóri RÚV, og Ásgeir Páll.
Heimsókn Hvati, Hilmar Björnsson, íþróttastjóri RÚV, og Ásgeir Páll. — K100/AGÓ
HM Eiður Smári Guðjohnsen verður sérfræðingur RÚV á leikjum Íslands.
[ Smellið til að sjá stærri mynd ]
Það styttist óðum í HM í knattspyrnu og það má með sanni segja að þjóðin bíði spennt eftir leikjum Íslands. RÚV mun sýna frá öllum leikjunum á mótinu og búist er við gríðarlegu áhorfi. Hilmar Björnsson íþróttastjóri RÚV fór yfir undirbúninginn í Magasíninu á K100 í vikunni.

Ásgeir Páll Ágústsson

asgeirpall@k100.is

Hilmar Björnsson íþróttastjóri RÚV heimsótti Magasínið á K100 í vikunni, en hann segir að íþróttafréttamenn RÚV séu í óða önn að undirbúa útsendingar frá HM sem fram fer í Rússlandi í sumar. Boðið verður upp á fjölbreytta dagskrá auk útsendinga frá öllum leikjum mótsins.

Eiður Smári Guðjónsen verður sérfræðingur RÚV á leikjum Íslands og mun að auki framleiða þrjá sjónvarpsþætti um andstæðinga Íslands. Hann mun fara til Króatíu, Nígeríu og Argentínu og ræða við gömlu fótboltastjörnurnar í þeim löndum og forvitnast um hvað þær vita um Ísland. Í febrúar byrjum við að sýna þætti sem heita saga HM. Leiðin á HM eru svo hefðbundnir þættir sem fjalla um aðdragandann að mótinu sjálfu.

Edda Sif Pálsdóttir fylgir landsliðinu eftir um þessar mundir, kynnist leikmönnum, skyggnist inn í einkalíf þeirra og afraksturinn verður sýndur á skjánum innan tíðar.

Stuttu áður en mótið sjálft hefst verður boðið upp á þætti úr myndveri með gestum sem ræða mótið, spá í möguleika liðsins til að ná langt og svo framvegis.

Á leikjunum sjálfum verður heljarinnar HM partý við Arnarhól. Þar að auki verður HM torg við Ingólfstorg rétt eins og þegar liðið keppti á EM í Frakklandi fyrir tveim árum. Á báðum þessum stöðum verða starfsmenn RÚV með beinar útsendingar. Svo verður fólk í myndveri, auk allra þeirra sem verða í Rússlandi að fylgjast með. Það verður því öllu til tjaldað í þessum stærsta sjónvarpsviðburði sem verið hefur hér á landi.

Gætum allteins náð langt

Fram kom í máli íþróttastjórans að þó margir telji að Íslendingar ættu ekki að gera sér miklar vonir á mótinu úti er landsliðið okkar í 18. sæti á styrkleikalista FIFA. „Margir telja að við séum bara að fara út til að vera með, en FIFA metur það þannig að við ættum að lenda í 18. sæti af þeim 32 bestu þjóðum sem taka þátt. Þessir strákar hafa óbilandi trú á sjálfum sér og munu leggja allt í sölurnar.“

Fleiri verða við sjónvarpstækin

Hilmar segist búast við því að færri Íslendingar muni heimsækja Rússland en Frakkland fyrir tveim árum síðan og því verði áhorfið á leikina í sjónvarpinu mun meira. Ferðalag til Rússlands sé talsvert dýrara og svo geti ferðalögin innanlands verið löng og ströng.

HM er gríðarleg veisla. „Þetta eru í heildina 64 leikir. Fyrstu 12 dagana eru spilaðir þrír leikir á dag með einni undantekingu þegar 4 leikir verða spilaðir einn daginn. Leiktímarnir eru kl. 12. 15:00 og 18:00 sem eru fínir tímar fyrir okkur hér á landi,“ sagði Hilmar Björnsson og greinilegt er að það er hugur í yfirmanni íþróttamála hjá RÚV.