Guðrún Hafsteinsdóttir, formaður SI, og Ármann Þorvaldsson, forstjóri Kviku.
Guðrún Hafsteinsdóttir, formaður SI, og Ármann Þorvaldsson, forstjóri Kviku.
Kvika og Samtök iðnaðarins hafa gert með sér samning um stofnun Hvatningarsjóðs Kviku sem hefur það hlutverk að veita styrki til nema í iðn- og starfsnámi með það að markmiði að vekja athygli á mikilvægi náms og starfa á þessu sviði.

Styrktarfjárhæð sjóðsins er 5 milljónir króna árlega fram til ársins 2020. Heildarstyrkir munu því nema 15 milljónum króna. Í apríl verður hægt að sækja um styrkina og í september verður greint frá úthlutun þeirra til allt að 14 iðnnema.

Markmið með stofnun sjóðsins er að efla umræðu og vitund um mikilvægi iðn- og starfsnáms og þýðingu starfa sem því tengjast fyrir íslenskt atvinnulíf. Skortur er á iðnmenntuðu starfsfólki og er sá skortur víða orðinn hamlandi fyrir starfsemi fyrirtækja. Samtök iðnaðarins og Kvika taka því höndum saman og vilja með stofnun sjóðsins vekja athygli á iðnnámi og hvetja þá sem velja að mennta sig á þessu sviði. Lögð verður áhersla á að jafna hlut kynjanna með því að hvetja konur sérstaklega til að skoða tækifæri sem bjóðast í iðn- og starfsnámi.

Á myndinni eru Guðrún Hafsteinsdóttir, formaður SI, og Ármann Þorvaldsson, forstjóri Kviku, við undirritun samningsins.