Benedikt Jón Hilmarsson

Elsku Benni minn, það er sárt að þurfa að kveðja þig, það átti enginn von á þessu, enginn fyrirvari. Minningarnar streyma fram. Við vorum ung þegar við hittumst, ég á sextánda ári og þú átjánda. Þú og nokkrir vinir þínir frá Dalvík ákváðu að fara á vertíð austur á Eskifjörð. Ég hafði strax augastað á þér og að ná í þig sem tókst fljótlega. Við tók mikil vinna og mikið fjör. Vinirnir fóru svo heim, en við bjuggum heima hjá mömmu og pabba í nokkra mánuði og fórum svo að búa. Þú ákvaðst svo að læra smiðinn, fluttum við þá til Akureyrar. Þegar þú varst búinn að læra vorum við búin að eignast frumburðinn okkar hann Hilmar, þá langaði mig heim í faðm fjölskyldunnar. Þú fórst að vinna við smíðar, svo á sjóinn og varst þar í 10 ár en smíðarnar toguðu alltaf í þig, sem varð til þess að þú hættir alfarið á sjónum. Við eigum þrjú yndisleg börn og tvö barnabörn sem við lifðum fyrir og gáfu okkur svo mikið. Þið áttuð ykkar stundir saman, á hverjum laugardegi fórstu með þær í bakaríið og í ísbúðina. Þegar sú eldri vissi að þú værir farinn var fyrsta spurningin: Hver fer þá með okkur í bakaríið? Svo féllu tár. Þú hugsaðir mikið til þeirra og barnanna okkar þegar þú vissir hvert stefndi, þér var umhugað um að við hefðum það gott, hugsaðir alltaf um alla á undan sjálfum þér. Ég hef aldrei kynnst eins jákvæðum manni og ótrúlega geðgóðum og þér.

Við eigum margar góðar minningar, ferðalög erlendis voru mikið áhugamál. Vorum við búin að fara víða og áttum yndisleg jól og áramót í Mexíkó síðustu jól. Síðasta ferðin þín var árleg fótboltaferð til London með sonum okkar að sjá liðið þitt, Arsenal, spila. Eins hafðir þú mikinn áhuga á tónlist, varst mikil félagsvera og vildir alltaf hafa eitthvað á prjónunum. Þú gekkst í Lionsklúbb Eskifjarðar og hafðir gaman af þeim félagsskap. Einnig gekkst þú í Lionsklúbbinn í Grafarvogi þegar við fluttum suður.

Elsku ástin mín, það verður erfitt að vera án þín. Við vorum búin að plana allt annað, en ég lofaði þér að vera sterk.

Hvíldu í friði, elsku Benni minn.

Elsku besti pabbi minn, ég trúi ekki að þú sért farinn frá okkur. Þetta gerðist allt of snöggt og ég er enn að átta mig á þessu. Við áttum eftir að gera svo margt saman og þú varst með svo margt á prjónunum.

Eitt af sameiginlegum áhugamálum okkar voru ferðalög og eigum við ófáar minningar af þeim, núna síðast fórum við til Mexíkó yfir jól og áramót. Þú varst svo mikill húmoristi og alltaf svo gaman að vera í kringum þig. Það sem við hlógum og skemmtum okkur vel, þetta var ein besta ferð sem ég hef farið í. Ég er svo þakklát fyrir allar þessar yndislegu ferðir sem við fórum í saman.

Þú varst besti pabbi í heimi, ég var svo mikil pabbastelpa og við áttum svo náið og gott, einstakt samband. Þú gerðir allt fyrir mig og ég gat alltaf leitað til þín með hvað sem er. Ég var svo heppin með þig.

Það var alltaf svo gott að vera í kringum þig, þú varst alltaf hress og kátur, aldrei fúll. Ég skildi ekki hvernig hægt var að vera alltaf í svona góðu skapi. Ég hef aldrei kynnst svona geðgóðum og jákvæðum manni, hjúkrunarkonurnar á spítalanum töluðu mikið um það.

Það verður svo tómlegt án þín, þú hélst uppi fjörinu og varst svo duglegur að drífa okkur áfram í hlutina.

Ég sakna þín svo mikið og það er erfitt að hugsa sér lífið án þín. En ég held fast í allar góðu minningarnar okkar og þú verður alltaf í hjarta mínu.

Þín,

Faðir minn var einstakur, örlátur og alltaf léttur í lund. Ég hef alla mína tíð unnið með honum, það eru forréttindi að fá að vinna með föður sínum og feta í hans fótspor. Hann er mín fyrirmynd. Hann hvatti mig til dáða þegar ég byrjaði í námi sem húsasmíðameistari og brosti sínu breiðasta við útskrift okkar bræðra sólríkan dag í maí í fyrra. Ég veit að hann var stoltur af mér.

Eftir því sem ég varð eldri urðum við pabbi meira vinir en faðir og sonur, hann var einn af mínum bestu vinum og ég vissi að ég gat alltaf leitað til hans.

Ég er þakklátur fyrir allar stundirnar og utanlandsferðirnar, þá sérstaklega fótboltaferðirnar sem við feðgar áttum saman.

Hvíldu í friði, pabbi minn.

Elsku besti pabbi. Ekki hefði ég getað ímyndað mér það fyrir þremur vikum þegar við lögðum af stað til London í okkar árlegu feðgaferð, að ég sæti hér og væri að rita þessi kveðjuorð. Þú varst mér mikil og góð fyrirmynd og er mér efst í huga þakklæti fyrir þann vinskap sem við feðgar áttum. Okkur leiddist aldrei saman, hvort sem það var í vinnu, heima með stelpunum okkar eða í utanlandsferðum og hjá þér var alltaf stutt í húmorinn. Þú varst einstaklega jákvæður og var alltaf gott að leita til þín og spjalla um lífið og tilveruna. Þú varst harður af þér, kannski má segja að það hafi stundum gengið of langt og ætli það lýsi þrautseigju þinni ekki best þegar þú flísalagðir með mér eldhúsið í Langadal, þá hálsbrotinn. Þá í þessum snörpu og erfiðu veikindum var þér efst í huga að ég og Símon myndum hugsa um mömmu og Sonju Björk systur og svo minntir þú okkur á að við yrðum að halda í gleðina.

Ég lofa að gera mitt og standa við það. Minning þín lifir í hjarta mínu. Við sjáumst seinna, elsku pabbi.

Þinn sonur,

Benni tók á móti mér opnum örmum frá fyrsta degi, alltaf var ég velkomin í hópinn ykkar. Hann var örlátur, glaðlyndur og fyndinn.

Ég minnist þess þegar hann heimsótti okkur til Reykjavíkur og við fengum okkur sushi og þegar við skemmtum okkur saman á sjómannadaginn á Eskifirði.

Þegar kom að því að festa kaup á okkar fyrstu íbúð hafði ég Benna mér til halds og traust, Símon var í Vestmannaeyjum að vinna, svo Benni aðstoðaði mig við valið. Ég treysti honum fullkomlega og mér leið alltaf vel í kringum hann, hann hafði svo góða nærveru.

Það eru forréttindi að hafa fengið að kynnast Benna og ég mun geyma allar minningarnar á góðum stað í hjarta mínu.

Hvíldu í friði, elsku tengdapabbi.

Í dag kveðjum við elsku mág minn eftir stutt en erfið veikindi, söknuðurinn er mikill og sárt að sjá á eftir þér, elsku Benni minn. Hann Benni var alltaf svo góður við mig, þegar hann var að læra smíðar á Akureyri þá smíðaði hann handa mér fallegt rúm og bekk sem var dótakassi. Ég man hvað ég var ofboðslega ánægð með þessa gjöf frá þér, elsku Benni. Þegar Davíð maðurinn minn flutti austur á Eskifjörð til mín, þá tókst þú honum opnum örmum og réðir hann til þín í vinnu. Þar lærði hann margt af þér sem nýttist honum vel þegar við fórum að innrétta húsið okkar. Alltaf var hægt að leita til þín og fá ráð. Ekki létuð þið Matta ykkar eftir liggja að hjálpa okkur að koma húsinu í stand og verð ég þér ævinlega þakklát fyrir það.

Spánarferðirnar sem við fórum með fjölskyldum okkar til Alicante og Costa Brava voru svo skemmtilegar þar sem þú varst hrókur alls fagnaðar. Við gerðum mjög vel við okkur í mat og drykk og nutum samverunnar með ykkur. Mikið saknaði ég ykkar þegar þið fluttuð suður og ekki var hægt að kíkja inn í kaffi til ykkar lengur. Það var alltaf svo notalegt að koma til ykkar Möttu.

Elsku Benni, ég veit að það var vel tekið á móti þér. Hvíldu í friði, elsku mágur.

Elsku Matta, Hilmar, Sonja Björk, Símon, Freyja, Arnrún, Sonja Salín og Steinunn Matthildur. Guð styrki ykkur á þessum erfiðu tímum.

Þín mágkona

Elsku hjartans Benni.

Það sem lífið getur verið hverfult. Það eru einungis liðnir örfáir dagar síðan þú bankaðir hér upp á og sóttir afagullin þín í bakaríið, en það var fastur liður hjá ykkur vinunum á laugardögum. Í nokkur skipti fékk Hilmar að koma með, en það var ekki vinsælt, Sonja og Steinunn vildu fá athygli þína óskipta. Þú bjóst til fallegt lítið samfélag með dætrum mínum sem þær munu búa að um alla ævi. Ást þín og umburðarlyndi gagnvart þeim var og mun ætíð vera mér mikils virði.

Þú varst einstaklega glaðlyndur og brosmildur maður með hjarta úr gulli. Þú tókst mér opnum örmum þegar ég mætti sem ung stúlka á Eskifjörð, ástfangin af syni þínum. Ég hefði ekki getað óskað mér betri tengdaföður.

Takk fyrir alla þína hlýju í minn garð. Takk fyrir að vera stelpunum mínum yndislegur afi og vinur.

Minning þín mun lifa með okkur og þú lifa í þeim.