Verð á páskaeggjum hefur lítið hækkað síðan í fyrra og reyndar er algengara að það hafi staðið í stað eða lækkað lítillega. Þetta sýnir ný könnun verðlagseftirlits ASÍ á verðlagi á páskaeggjum í ár og í fyrra.
Undantekning voru verðhækkanir í Hagkaup, þar hækkuðu sjö páskaegg af 15 og var mesta verðhækkunin 26%, eða 700 kr., á Freyju-ríseggi nr. 9 og næstmesta hækkunin þar var á Góu-eggi nr. 4, sem hafði hækkað um 25%.
Mest lækkuðu páskaeggin í Nettó, þar lækkuðu tíu páskaegg í verði af þeim 15 sem voru í könnuninni. Mest lækkaði sterkt Freyju-djúpuegg, um 12%.
Í öðrum verslunum sem kannaðar voru mátti finna smávægilegar hækkanir og lækkanir á víxl og í mörgum tilfellum stóð verðið í stað.
Borið var saman verð úr verðlagskönnun ASÍ sem gerð var 6. apríl í fyrra og verð hinn 20. mars síðastliðinn. Könnunin náði til eftirtalinna verslana: Bónuss, Krónunnar, Nettó, Fjarðarkaupa, Hagkaupa og Iceland. Hvorki er lagt mat á gæði né þjónustu söluaðila, eingöngu er um beinan verðsamanburð að ræða.