Magnús Heimir Jónasson
mhj@mbl.is
Umhverfis- og auðlindaráðherra skilaði skýrslu til Alþingis um aðdraganda og útgáfu starfsleyfis til kísilverksmiðjunnar Sameinaðs sílikons hf. í Helguvík í gær. Í skýrslunni kemur m.a. fram að ef eigi að vera áframhaldandi starfsemi í verksmiðjunni í Helguvík þurfi rekstraraðilar að uppfylla kröfur laga og reglugerða um starfsemina. Í því sambandi þurfi að ljúka endanlegum úrbótum í tengslum við mannvirkjagerðina og skipulag. Þá hafi Umhverfisstofnun tilkynnt rekstraraðila um endurskoðun á starfsleyfi verksmiðjunnar m.a. vegna nauðsynlegrar uppfærslu í ljósi breytinga á lögum.
Í skýrslunni segir ráðuneytið að það sé ljóst að rekstraraðili Sameinaðs sílikons hf. uppfyllti ekki tilteknar kröfur í lögum og reglugerðum auk þeirra krafna sem settar voru fram af stjórnvöldum. Þá hafi útgefið byggingarleyfi og mannvirkjagerð hvorki verið í samræmi við mat á umhverfisáhrifum né gildandi skipulag. Ráðuneytið tekur einnig fram að Umhverfisstofnun hafi aldrei haft jafnumfangsmikið eftirlit með atvinnurekstri og reynslan af því víðtæka eftirliti sem haft var með starfsemi verksmiðjunnar í Helguvík hafi þegar verið nýtt við undirbúning starfsleyfa fyrir sambærilega starfsemi á öðrum stöðum, s.s. með ítarlegri ákvæðum um varnir gegn lyktarmengun við útgáfu starfsleyfis kísilverksmiðju PCC við Bakka á Húsavík.
„Ljóst er að málefni Sameinaðs sílikons hf. eiga sér engin fordæmi hérlendis. Mikilvægt er að læra af þeirri reynslu sem hér hefur skapast,“ segir í niðurlagi skýrslunnar.