Sýningin Við mið // at present verður í Listasafni Sigurjóns Ólafssonar í dag kl. 17 og er hún samstarfsverkefni Listasafns Íslands, Listaháskóla Íslands og Háskóla Íslands. Á henni má sjá ný verk unnin af meistaranemum í myndlist við Listaháskóla Íslands en meistaranemar í listfræði við Háskóla Íslands fara með sýningarstjórn.
Verkin eru fjölbreytt og víðfeðm og spanna ólíka efnismeðferð, að því er fram kemur í tilkynningu og eiga öll sameiginlegt að vera sköpuð sérstaklega inn í rými safnsins. Þau eru innblásin af skúlptúrverkum Sigurjóns, safninu sem tileinkað er honum og staðháttum á Laugarnesinu þar sem safnið er.
Um sýninguna segir m.a. í tilkynningu að á henni standi ekkert í stað, verkin tengist handan tungumálsins og gestum sé boðið að skyggnast inn í þá sköpun og tjáningu sem eigi sér stað í hinu efnislega. „Hér er samvinnan og hið óljósa samtal í forgrunni sem teygir anga sína bæði aftur í tímann og fram á við,“ segir í tilkynningunni og að titill sýningarinnar ávarpi þrjú stef í senn, þ.e. „við“ sem sé heildin sem við séum öll hluti af, hrærumst í og snertum; „mið“ sem sé gróska fundarstaðarins og samtalið sem skapast við það að leita á ný mið og „viðmið“ sem sé fortíðin sem lifir áfram og núið sem sé stöðugt að verða til.
Sýningarstjórar eru Ásgerður Júníusdóttir, Ragnheiður K. Sigurðardóttir, Sunna Ástþórsdóttir og Þorgerður Þórhallsdóttir.
Til baka
Leita í greinasafni
Prenta grein
