RÚV leggur jafnan mikið undir, eða tugi milljóna króna, þegar Eurovision er annars vegar. Öllu er tjaldað til. Fyrst er að velja lögin, síðan flytja þau í sjónvarpi, velja keppanda Íslands, undirbúa flutning hans á evrópskri grund og loks er það lokakeppnin, að þessu sinni í Portúgal í næsta mánuði.
Sjónvarpsþátturinn Alla leið er liður í þessum undirbúningi, þar sem farið er yfir öll lögin í Eurovision og þau vegin og metin af tónlistar- og áhugafólki um þessa keppni. Það var óneitanlega mjög sérstakt að sjá hvaða útreið íslenska lagið fékk í fyrsta þættinum. Þar hraunuðu allir yfir lagasmíðina, nema þáttastjórnandinn Felix Bergsson, en söngvaranum unga, Ara Ólafssyni, var hrósað í hástert. Helga Möller bætti um betur og sagði öll lögin í undankeppninni íslensku hafa verið óspennandi.
Ljósvaka finnst lagið, sem Þórunn Clausen samdi, vinna stöðugt á og Ari flytur það frábærlega. Vonandi hefur Felix rétt fyrir sér um að Ari muni fljúga inn í úrslitin í Portúgal, en af hverju RÚV reyndi að slátra eigin framlagi er ómögulegt að segja til um. Geta lagahöfundar átt von á því framvegis?
Björn Jóhann Björnsson
Til baka
Leita í greinasafni
Prenta grein
