David Cook er fæddur í Paignton, Englandi árið 1983. Hann er með BA próf í hagfræði frá háskólanum í Exeter frá árinu 2005 og lauk MSc prófi í sjálfbærri þróun frá sama skóla árið 2007.
David Cook er fæddur í Paignton, Englandi árið 1983. Hann er með BA próf í hagfræði frá háskólanum í Exeter frá árinu 2005 og lauk MSc prófi í sjálfbærri þróun frá sama skóla árið 2007. David hefur jafnframt MA gráðu í skipulagsfræðum frá háskólanum á Vestur-Englandi frá árinu 2012 og lauk MS gráðu í umhverfis- og auðlindafræði frá Háskóla Íslands árið 2014. David er núna nýdoktor við HÍ.

• David Cook hefur varið doktorsritgerð sína í umhverfis- og auðlindafræði. Heiti ritgerðarinnar er Stuðlað að sjálfbærni með notkun umhverfisvísa og hagrænu mati á vistkerfisþjónustu (Promoting environmental sustainability through the utilisation of an indicator set, ecosystem services perspective and non-market valuation techniques). Andmælendur voru Dr. Robert Costanza, Crawford School of Public Policy, Australian National University, og Dr. Giles Atkinson, London School of Economics and Political Science. Leiðbeinandi var dr. Brynhildur Davíðsdóttir prófessor í umhverfis- og auðlindafræði við Hagfræðideild Háskóla Íslands. Aðrir í doktorsnefnd voru dr. Daði Már Kristófersson, forseti Félagsvísindasviðs Háskóla Íslands, og dr. Ståle Navrud, Norges miljø- og biovitenskapelige universitet.

Í ritgerðinni eru umhverfisáhrif orkuframkvæmda á Íslandi sett í samhengi við sjálfbæra þróun og greind út frá mörgum sjónarhornum, meðal annars með tilliti til áhrifa á náttúrugæði. Ritgerðin í heild sýnir mikilvægi þess að Íslendingar auki þekkingu á virði náttúrugæða landsins í mismunandi vistgerðum og landslagi. Fjallað er um sambandið milli orkuframkvæmda og umhverfisáhrifa á Íslandi og lýst nýrri aðferðafræði við val á vísum til að meta umhverfislega sjálfbærni. Einnig er lagt til að verðmætamat sé notað til að meta kostnað umhverfisáhrifa. Fjallað er um hvaða verðmæti gætu verið tekin til greina í slíku mati og sömuleiðis við stjórnsýsluákvarðanir tengdar virkjanaframkvæmdum. Í þessu samhengi var greiðsluvilji almennings kannaður og beitt var svo kölluðu skilyrtu verðmætamati á tveimur jarðvarmasvæðum, Eldvörpum og Hverahlíð, til að greina vilja almennings til að vernda svæðin sem vísbendingu um virði náttúrugæða. Niðurstöður sýna að greiðsluvilji fyrir vernd Eldvarpa var að meðaltali 8.433 kr. og 7.122 kr. fyrir Hverahlíð. Sömu aðferðafræði var beitt til að meta greiðsluvilja til að vernda Heiðmörk og reyndust skattgreiðendur tilbúnir til að greiða frá 17.039 kr. til 24.790 kr. til að tryggja vernd Heiðmerkur.

Höf.: David Cook