Í fréttum í gær var sagt að borgarstjórinn hefði lofað hagsmunaaðilum lóðum. Það er hróssefni hversu nýtnir menn eru á gömul loforð, þótt verra sé að einungis samfelld svik geri nýtnina mögulega.
En við bætist sá kostur að það er hægt að nýta sama gamla góða glærusjóið í áróðurinn.
Á rándýrum veltiskiltum bryddar Dagur svo skyndilega upp á því loforði að „að setja Miklubrautina í stokk.“ Þá brellu hafði auðkeyptur ómerkingur boðað fyrir fáeinum vikum og notað tækifærið til að fara með fleipur um látinn sómamann.
En þetta loforð um stokkinn er athyglisvert af fleiri ástæðum. Síðustu misserin hefur verið eytt vel á annan milljarð í gagnslitlar breytingar á Miklubrautinni m.a. með því að dunda mánuðum saman við að hrauka grjóti í vírgirðingu meðfram henni.
Varla hefur nokkur verið að hugsa þá stundina um „stokk“ utan um brautina sem kostar margfalda þá fjárhæð.
Það eru augljóslega frumlegir menn í trúmálum sem láta múslíma fá fría lóð undir mosku en rukka Hjálpræðisherinn, sem unnið hefur óeigingjarnt starf í þágu þeirra sem minnst mega sín í borginni í meira en öld.
Og svo koma óvænt nýjar vísbendingar um að núverandi borgaryfirvöld trúi ekki á neitt nema stokk og steina.
Til baka
Leita í greinasafni
Prenta grein
