Á höfuðborgarsvæðinu hafa frjókorn verið mæld samfellt frá árinu 1988.
Á höfuðborgarsvæðinu hafa frjókorn verið mæld samfellt frá árinu 1988. — GettyImages/iStockphoto
[ Smellið til að sjá stærri mynd ]
Nú er blómaskeið frjókornatímabilsins að renna upp en því fylgir ofnæmi og óþægindi hjá mörgum. Það er hinsvegar sitthvað hægt að gera til að bæta líðanina og gera þetta tímabil skárra. Inga Rún Sigurðardóttir ingarun@mbl.is

Sumarið er erfiður tími fyrir þá sem þjást af frjókornaofnæmi en það er þó ýmislegt hægt að gera til að hjálpa til. Hér eru ýmis góð ráð sem gera frjókornatímabilið bærilegra en auðvitað kemur ekkert í staðinn fyrir lyf og heimsókn til ofnæmislæknis. Ráðin hér á eftir eru hinsvegar hagnýt og hjálpa til.

Fylgstu með frjókornamælingum

Það er mikilvægt að fylgjast með frjókornamælingum og spám til að forðast óvenjulega slæmt ástand ef hægt er. Þá er gott að vera inni í skjóli. Best er að fara út eftir rigningu því hún hreinsar frjókorn úr loftinu.

Í grein sem birtist á vef Guardian er mælt með því að ef fólk með ofnæmi þarf að vera úti á dögum þegar frjókornamagn er mikið setji það vaselín undir nasir til að stöðva frjókornin og noti sveigð sólgleraugu sem leggjast vel að andlitinu til að loka fyrir frjókornin.

Á höfuðborgarsvæðinu hafa frjókorn verið mæld samfellt frá árinu 1988. Lengst af var gildran staðsett í mælireit Veðurstofu Íslands í Reykjavík en var flutt í Garðabæ vorið 2011. Á Akureyri hafa frjókorn verið mæld samfleytt frá árinu 1998.

www.ni.is/greinar/frjomaelingar

Tedrykkja og karríréttir

Kaffidrykkja getur ýtt undir ofnæmisáhrifin svo það er kjörið að fá sér kamillute í staðinn sem inniheldur náttúruleg antihistamín. Brenninetlute er líka talið hjálpa til við að draga úr ofnæmisviðbrögðum.

Mjólkurvörur og sykraðar matvörur geta ýtt undir einkenni eins og stíflað nef þar sem þær auka slímframleiðslu í öndunarvegi.

Matur á borð við brokkolí, aspas, lauk, hvítlauk, kirsuber og ananas inniheldur antihistamín svo það er sniðugt að hugsa um hvað maður lætur ofan í sig.

Matgæðingar ættu líka að elda góðan karrírétt því túrmerik dregur úr bólgum.

www.myhayfever.com.au

Þvottur og hreint inniloft

Mikilvægt er að þvo hendur oft. Þegar frjókornamagn er mikið er best að fara í sturtu þegar heim er komið og þvo hárið vel því þar safnast frjókorn saman.

Það er betra að hafa glugga og dyr lokaðar eins mikið og hægt er og það getur gert gagn að nota lofthreinsitæki með HEPA-síu. Líka er gott að nota ryksugu með HEPA-síu.

Nauðsynlegt er að skipta oftar en venjulega um rúmföt og þvo þau á háum hita.

Það segir sig kannski sjálft en það má alls ekki þurrka rúmfötin á útisnúru.