Samstarf Guðlaugur Þór Þórðarson og Laura Tuck varaforseti Alþjóðabankans undirrita viljayfirlýsingu.
Samstarf Guðlaugur Þór Þórðarson og Laura Tuck varaforseti Alþjóðabankans undirrita viljayfirlýsingu. — Ljósm/Utanríkisráðuneytið
Í vikunni skrifaði Guðlaugur Þór Þórðarson utanríkisráðherra undir viljayfirlýsingu milli Íslands og Alþjóðabankans um aukið samstarf á sviði sjálfbærrar nýtingar sjávarauðlinda og málefna hafsins.

Í vikunni skrifaði Guðlaugur Þór Þórðarson utanríkisráðherra undir viljayfirlýsingu milli Íslands og Alþjóðabankans um aukið samstarf á sviði sjálfbærrar nýtingar sjávarauðlinda og málefna hafsins. Var þetta gert jafnhliða því sem ráðherrann fundaði með með Lauru Tuck sem er varaforseti Alþjóðabankans á sviði sjálfbærrar þróunar. Í yfirlýsingunni felst að Ísland styðji við verkefni bankans á þessu sviði, bæði með íslenskri sérfræðiþekkingu og með stuðningi við fiskimál og fiskimannasamfélög á þeim stöðum þar sem bankinn er með verkefni fyrir. Samskonar samstarf er nú þegar í gildi á sviði jarðhitamála, segir í tilkynningu.

„Þetta aukna samstarf við bankann er mikilvægur þáttur í að nýta íslenska sérþekkingu í þróunarverkefnum og koma henni á framfæri innan alþjóðastofnana, en á það var einmitt lögð áhersla í skýrslu stýrihóps um utanríkisþjónustu til framtíðar,“ er haft eftir Guðlaugi Þór í tilkynningu.

Mikilvægur bakhjarl

Á fundinum greindi utanríkisráðherra frá áherslu Íslands á málefni hafsins í þróunarsamvinnu Íslands og mikilvægi samstarfs Íslands og Alþjóðabankans á því sviði, enda bankinn mikilvægur bakhjarl við fjármögnun verkefna á sviði sjálfbærrar þróunar. Laura Tuck þakkaði Íslandi fyrir góða samvinnu á sviði sjálfbærrar auðlindanýtingar. Hún tók fram að stuðningur Íslands mundi nýtast vel í verkefnum í aðildarríkjum bankans. Mikil þörf væri á sérfræðiaðstoð á þessu sviði.