Fyrir tæpum 40 árum, snemma í júní árið 1978, handtók lögreglan í Reykjavík Þjóðverja að nafni Konrad Ciesielski og son hans, Lothar, eftir að hafa veitt feðgunum eftirför um landið í fimm daga. Morgunblaðið sagði Konrad þekktan víða um Evrópu fyrir þjófnaði á fálkaungum og þar sem rökstuddur grunur lá á um það að hann hefði komið til landsins nokkrum árum fyrr í þeim erindagerðum að stela fálkaungum úr hreiðrum hefði þótt vissara að hafa á honum góðar gætur.
Fylgst var með ferðum feðganna. „Fóru þeir hægt yfir og stoppuðu víða og þá fyrst og fremst á stöðum, þar sem fálka- og arnarvarp er,“ sagði Morgunblaðið um ferð feðganna norður í land.
Þeir voru handteknir við komuna til Reykjavík en höfðu hvorki fálkaegg né unga í fórum sínum en lögregla gerði upptækan ýmsan búnað, sem sagt var að hentaði vel til að komast á staði sem erfitt væri að ná til, t.d. að hreiðrum. „Voru þeir með í bílnum kaðla og sigbúnað, stengur með lykkju á endanum, sem fróðir menn segja að notuð sé til að krækja í fálkaunga úr hreiðrum og ennfremur búnað til þess að halda eggjum heitum.“
Fram kemur í fréttinni að tveimur árum áður hafi nokkrir fálkaungar fundist í kassa á salerni flugstöðvarinnar í Keflavík vorið 1976. „Var ljóst að fálkaveiðimenn höfðu ætlað að koma ungunum úr landi en orðið að skilja þá eftir í flugstöðinni. Við athuganir á farþegalistum kom í ljós, að þennan sama dag hafði fyrrnefndur Konrad Ciesielski farið af landi brott ásamt konu sinni og var talið víst að þau hjónin hefðu ætlað að smygla ungunum úr landi.“
Til baka
Leita í greinasafni
Prenta grein
