Sýning breska listamannsins og hönnuðarins Daniels Lismores, Be yourself, everyone else is already taken , eða Vertu þú sjálfur, allir aðrir eru fráteknir, verður opnuð í Hörpu á morgun kl. 18 og er hún á dagskrá Listahátíðar í Reykjavík sem hófst í gær og stendur til 17. júní.
Lismore er listamaður, fatahönnuður, stílisti, rithöfundur og baráttumaður, búsettur í London, að því er fram kemur á vef hátíðarinnar, og hefur tímaritið Vogue útnefnt hann sem sérviskulegast klædda mann Englands. Hann er þekktur fyrir íburðarmikinn og yfirgengilegan klæðnað sem sameinar á stórkostlegan máta hátísku og hans eigin hönnun, notuð efni, fundna hluti, hringabrynjur, skartgripi ólíkra menningarhópa, hattagerðarlist og margt fleira, eins og það er orðað á hátíðarvefnum. Segir þar að útkoman sé „ein allsherjar tjáning óheflaðrar skapandi orku“.
Um sýninguna segir að á henni bjóðist gestum að „sökkva sér niður í hinn einstaka heim Daniels Lismores – að lifa sem list“ og að hann hafi skapað skúlptúra í fullri stærð og sótt innblástur til barnæsku sinnar og kínverskra leirhermanna. „Hver skúlptúr er skrýddur alklæðnaði sem Lismore hefur sjálfur klæðst á þýðingarmiklum augnablikum í lífi sínu,“ segir um verkin. Á sunnudaginn kl. 21 mun Lismore fjalla um listsköpun sína, uppruna og leið inn í listina í Klúbbi Listahátíðar í Hafnarhúsi.
Til baka
Leita í greinasafni
Prenta grein
