N'Golo Kanté fæddist í París fyrir rúmum 27 árum. Hann þykir vera einstaklega mikilvægur leikmaður fyrir franska landsliðið sem nú ætlar að freista þess að blanda sér í verðlaunabaráttu á HM í Rússlandi.
Kanté er varnartengiliður er sérlega öflugur í að brjóta á bak aftur sóknarleik andstæðinganna. Ekki nóg með heldur er hann einnig útsjónarsamur við að byggja upp sóknarleikinn jafnharðan og boltinn hefur verið unninn. Þykir Kanté minna um margt á þann farsæla og harðskeytta Claude Makélélé sem gerði garðinn frægan með franska landsliðinu í lok síðustu aldar og í upphaf þessarar. Auk þess eiga þeir sameiginlegt að hafa leikið með Chelsea.
Kanté sló í gegn með Leicester leiktíðina sem liðið varð óvænt enskur meistari, 2015/2016. Þá um sumarið keypti Chelsea kappann. Kanté hefur klæðst franska landsliðsbúningum 24 sinnum og skorað eitt mark. Áður en Kanté kom til Leicester 2015 hafði hann leikið með Boulogne og Caen.
Til baka
Leita í greinasafni
Prenta grein
