Gjaldtöku í Hvalfjarðargöngum verður hætt í september og tekur ríkið við göngunum í haust. Þetta kemur fram í frétt á vefsíðu Spalar. Einkahlutafélaginu Speli verður slitið eftir að göngin verða afhent ríkinu en ríkið ætlar ekki að ráða neinn til sín úr núverandi starfsmannahópi Spalar. Í samgöngu- og sveitarstjórnarráðuneytinu var ákveðið í maí að ríkið tæki við göngunum einum en ekki félaginu sem á þau og rekur.
Á vef Spalar kemur fram að veglyklar verði innkallaðir gegn greiðslu skilagjalds, viðskiptavinir fá greiddar inneignir sínar á áskriftarreikningum og greitt verður fyrir ónotaða afsláttarmiða. Gert er ráð fyrir að uppgjörið standi yfir til loka ársins og að frágangi bókhalds og annars sem tilheyrir starfslokum og slitum Spalar ljúki ekki fyrr en á fyrsta fjórðungi nýs árs.
Til baka
Leita í greinasafni
Prenta grein
