Sérfræðingar segja að besta lykt sem hugsast getur sé líkamslykt þeirra sem eru manni kærir. Þessu samsinnir Víkverji, allavega á meðan hreinlætis er gætt. Óskandi væri að fleiri meðtækju þennan sannleik.
Sérfræðingar segja að besta lykt sem hugsast getur sé líkamslykt þeirra sem eru manni kærir. Þessu samsinnir Víkverji, allavega á meðan hreinlætis er gætt. Óskandi væri að fleiri meðtækju þennan sannleik.
Takmörkum er háð hversu vel dauðlegir menn geta ilmað. Ískyggilega margir hafa tröllatrú á gerviefnum sem eiga að ilma svo vel að þau komi í stað fyrir sturtu. Áhrifin eru oftast öfug. Svona umvandanir ættu kannski betur heima í unglingablaði en þó sorglegt sé þarf að minna suma fullorðna (karl)menn á að baða sig.
Yfirleitt gera menn þetta í réttri röð: fara í sturtu og úða svo á sig „ilm“vatninu, sem sjaldnast ber nafn með rentu. Þetta skal gert í einrúmi, án þess að stífla skilningarvit saklausra óbreyttra borgara. Víkverja greyinu er oft misþyrmt af vöðvastrákum í ræktarklefanum þegar þeir breyta honum í gasklefa með James Bond-rakspíranum sínum.
Betra, eða skárra, væri ef vöðvastrákarnir tækju sig til og veipuðu inni í klefanum. Gufa sú er allavega ekki svo sterk og yfirþyrmandi að Víkverji þurfi að hrökklast út í horn með handklæði fyrir vitunum. Þeir gætu allt eins farið að reykja inni eins og í gamla daga. En það færi ekki vel á því í líkamsræktarstöð.
Baggið, eins og vöðvastrákarnir kalla það, íslenskt neftóbak, er að vísu aufúsugestur í íþróttahreyfingunni. Enda byrjuðu menn að taka í vörina í skíðafélögunum norsku, að Víkverja minnir. Sá ósiður hefur þann kost að hann er ekki hættulegur öðrum en sjálfum neytandanum, ólíkt ilmvatni og reykingum.