Gátan er sem endranær eftir Guðmund Arnfinnsson: Kenndur við lyst á Akureyri. Eru kenndir við menntir fleiri. Sagður er hann sættir granna. Samastaður fyrstu manna.

Gátan er sem endranær eftir Guðmund Arnfinnsson:

Kenndur við lyst á Akureyri.

Eru kenndir við menntir fleiri.

Sagður er hann sættir granna.

Samastaður fyrstu manna.

„Svona lítur lausnin út í þetta sinn,“ svarar Harpa á Hjarðarfelli:

Lystigarður finnst á Akureyri.

Átt er við stúdentagarð.

Garður boðar sættir granna meiri.

Garður þessi Eden varð.

Guðrún Bjarnadóttir svarar:

Í Lystigarði akureyskar ættir.

Einnig Garður var í Kaupinhöfn.

Víst er traustur garður granna sættir.

Úr garði skilningstrés við þekkjum nöfn.

Helgi R. Einarsson leysir gátuna þannig:

Tengist menntalífi og lyst

og landamerki varðar.

Þarna Eva var í vist.

Víða finnast garðar.

„Hér er svo lausnin handa Guðmundi gátusmið,“ skrifar Helgi Seljan:

Á Akureyri Lystigarðinn líta má

og líka Garð mun nýta Háskólinn.

Grannasætti ljómandi áður innt var frá

Ásgarð ég í gömlum sögnum finn.

Þessi er skýring Guðmundar:

Lystigarður á Akureyri.

Eru hér menntagarðar fleiri.

Löngum sætti garður granna

Garður bústaður fyrstu manna.

Þá er limra:

Er Magnús í Miklagarði

bað Möggu frá Svignaskarði,

hún svaraði: „nei,

og svei, þér grey“,

og kauða á kjaftinn barði.

Að lokum er ný gáta eftir Guðmund:

Morgunsólar geislaglóð

gleður fram úr máta,

snjallt í hugann læðist ljóð

og laugardagsins gáta:

Hallir og hús það prýðir.

Heyrast það tala lýðir.

Rekin í réttarsal víða.

Ræða í áheyrn lýða.

Að lokum staka eftir Sigurð Breiðfjörð sem ekki þarfnast skýringa:

Kaldur vetur mæðir mig,

mold og keldur frjósa,

það er betra að bæla sig

við brjóstin á þér, Rósa.

Halldór Blöndal

halldorblondal@simnet.is