Víkverji er búinn að vera í líkamsræktarátaki núna í dágóðan tíma. Árangurinn hefur hins vegar látið á sér standa.
Víkverji er búinn að vera í líkamsræktarátaki núna í dágóðan tíma. Árangurinn hefur hins vegar látið á sér standa. Víkverji virðist þeirri náttúru gæddur að alveg sama hversu mörg kíló hann léttist um; ein óráðleg máltíð dugar til þess að skella þeim öllum á aftur. Á þessum rússíbana hefur nú gengið svo mánuðum skiptir og veit Víkverji varla hvað hann á að gera, því ekki kemur til greina að svelta sig.
Annars hefur Víkverji tekið eftir einu í matvörubúðinni. Í hillunum þar sem „hollu“ líkamsræktarmáltíðirnar eru er jafnan að finna ógrynnin öll af alls kyns „orkustöngum“, sem við nánari skoðun reynast vera þurrkaðir ávextir, ber og/eða hnetur, og allt saman húðað með salti og súkkulaði. Alveg sérstaklega súkkulaði. Það liggur við að hægt sé að fá súkkulaðihúðað súkkulaði, sem samt er sagt á einhvern hátt hollara en annað súkkulaði.
Svo eru það fæðubótarefnin, sem flest eru í formi einhvers konar prótíndufts, sem á að blanda við vatn og hrista duglega. Víkverji hefur ekki lagt í að fá sér þannig ennþá, en var næstum því búinn að taka af skarið um daginn þegar hann rakst á stóran dunk af prótíndufti, sem ekki bara var sagt vera með súkkulaðibragði heldur var dunkurinn merktur „MARS“ í bak og fyrir. Annar við hliðina var síðan merktur „Snickers“. Aðdáendur Mars- og Snickers-súkkulaðistykkjanna, sem hingað til hafa ekki beint verið fyrsti kostur þeirra sem eru að reyna að rækta líkamann, geta nú farið áhyggjulausir í ræktina og hrist sér síðan einn góðan Snickers eftir á.
Til baka
Leita í greinasafni
Prenta grein
