Með eiginkonu og sonum Talið frá vinstri: Steinunn, Ólafur Snær, Gunnar nýstúdent, Árni Bragi og Eyjólfur.
Frjáls eins og fuglinn Eyjólfur í einni af sínum svifflugsferðum.
[ Smellið til að sjá stærri mynd ]
Eyjólfur Guðmundsson fæddist í Reykjavík 20.10. 1968 þó að foreldrar væru búsett í Hafnarfirði. Foreldrar hans skildu þegar Eyjólfur var tveggja ára en fram að sex ára aldri átti hann heim í Reykjavík.

Eyjólfur Guðmundsson fæddist í Reykjavík 20.10. 1968 þó að foreldrar væru búsett í Hafnarfirði. Foreldrar hans skildu þegar Eyjólfur var tveggja ára en fram að sex ára aldri átti hann heim í Reykjavík. Þá flutti hann ásamt móður sinni og fósturföður, Halldóri Guðnasyni rafvirkja, í norðurbæinn í Hafnarfirði. Halldór er sonur Guðna Ólafssonar og Finneyjar Árnadóttur frá Suðureyri við Súgandafjörð.

Eyjólfur ólst upp í norðurbænum til 16 ára aldurs. Á unglingsárunum starfaði hann á Tálknafirði og bjó þá hjá föður sínum og konu hans, Unni Sigurðardóttur, uppeldisbróður og bræðrum sínum tveimur.

Að loknu grunnskólaprófi stundaði Eyjólfur nám við Verslunarskóla Íslands, flutti þá til Reykjavíkur. Að loknu stúdentsprófi var hann á vinnumarkaðnum í eitt ár, sinnti áhugamáli sínu, flugi, og velti því fyrir sér hvort hann ætti heldur að verða sagnfræðingur eða hagfræðingur.

Eyjólfur valdi hagfræðina, hóf nám við HÍ 1989, lauk bakkalárprófi í hagfræði 1992 og starfaði um tveggja ára skeið við HÍ, á Hagfræðistofnun og Sjávarútvegsstofnun. Sumarið 1992 var hann háseti og kokkur á rækjubát frá Húsavík. Mikil tenging við sjávarútveg ásamt óbilandi áhuga á hagfræði og stjórnun auðlinda leiddi til þess að hann skráði sig í doktorsnám við Háskólann í Rhode Island til að leggja stund á auðlindahagfræði með sérstakri áherslu á fiskveiðistjórnun. Hélt utan 1994 og lauk doktorsprófi í umhverfis- og auðlindahagfræði.

Eyjólfur hóf störf við sjávarútvegsdeild Háskólans á Akureyri 1999, var lektor þar, dósent og deildarformaður til 2007. Þá varð hann yfirhagfræðingur og forstöðumaður greiningardeildar CCP og starfaði þar til 2014. Þann 1.7. það ár tók Eyjólfur við sem rektor Háskólans á Akureyri og hefur sinnt því starfi síðan. Hann flutti þá aftur norður, ásamt eiginkonu og tveimur sonum en sá elsti bjó áfram í Mosfellsbæ.

Eyjólfur hefur birt greinar á sviði fiskveiðistjórnunar og hagfræði sjávarauðlinda og birt efni um hagkerfi sýndarveruleika.

Helsta áhugamál Eyjólfs er útivera allan ársins hring. Hann er auk þess mikill flugáhugamaður, flýgur svifflugvélum og mótorflugvélum, þó svifflugið skipi æ stærri sess þegar hann svífur um loftin blá.

Fjölskylda

Eiginkona Eyjólfs er Steinunn Arnars Ólafsdóttir, f. 28.8. 1968, sjúkraþjálfari og doktorsnemi.

Foreldrar hennar: Hjónin Elín Stella Gunnarsdóttir, f. 5.9. 1947, hjúkrunarfræðingur, og Ólafur Arnars, f. 21.9. 1946, d. 27.6. 1998, rafvirki.

Synir Eyjólfs og Steinunnar eru Árni Bragi Eyjólfsson, f. 11.12. 1994, nemi en unnusta hans er Sigdís Lind Sigurðardóttir nemi; Gunnar Eyjólfsson, f. 5.6. 1998, sölumaður, og Ólafur Snær Eyjólfsson, f. 6.10. 2003, nemi.

Hálfsystur Eyjólfs, sammæðra: Rakel Malmquist Halldórsdóttir, f. 12.7. 1977, leiðbeinandi í Hafnarfirði, og Erna Halldórsdóttir, f. 8.8. 1983, sjúkraþjálfari í Danmörku.

Hálfsystkini Eyjólfs, samfeðra: Ragnhildur Ösp Sigurðardóttir, f. 6.2. 1972, kennari í Mosfellsbæ; Friðrik Þór Steindórsson, f. 5.11. 1973, sjómaður í Vestmannaeyjum, og Yngvi Steindórsson, f. 15.11. 1977, flugvirki í Hafnarfirði.

Uppeldisbróðir Eyjólfs var Sigurður Bergþórsson, f. 18.5. 1968, d. 13.9. 2018.

Foreldrar Eyjólfs eru Svanhildur Guðmundsdóttir, f. 29.6. 1948, afgreiðslustjóri í Hafnarfirði, og Guðmundur Steindór Ögmundsson, f. 12.3. 1947, vélstjóri í Hafnarfirði.

Sjúpfaðir Eyjólfs er Halldór Guðnason, f. 18.7. 1943, rafvirki í Hafnarfirði. Stjúpmóðir Eyjólfs er Unnur Sigurðardóttir, f. 2.6. 1949, bankastarfsmaður í Hafnarfirði.