Guðmundur Magnússon
gudmundur@mbl.is
Atvikið þegar 13 kindur, níu ær og fjögur lömb, lokuðust inni og drápust í hrörlegu og aflögðu fjárhúsi á eyðibýli á ríkisjörðinni Eyri í Mjóafirði í Súðavíkurhreppi í sumar kann að breyta því hvernig opinberu eftirliti með slíkum fasteignum er háttað. Þetta segir Snævar Guðmundsson, forstjóri Ríkiseigna, í svari við fyrirspurn Morgunblaðsins í framhaldi af frétt blaðsins um málið í gær.
Vísað til ábúðarlaga
Svo virðist sem kindurnar hafi leitað inn í fjárhúsið fyrir tilviljun einhvern tíma í sumar sem leið en inngangurinn síðan hrunið og varnað þeim útgöngu. „Þær hafa drepist úr þorsta,“ sagði Sigríður Inga Sigurjónsdóttir, dýralæknir á Ísafirði, sem kölluð var á staðinn.Snævar segir að gerður hafi verið almennur leigusamningur um jörðina við nágrannabónda að Látrum í nóvember 2000.
Leigutakinn nýtti jörðina til slægna, var með geldneyti í fjárhúsi, geymdi vélar í hlöðu og nýtti jörðina að öðru leyti til beitar. Í leigusamningnum sé vísað til ábúðarlaga um meðferð á landi og viðhald mannvirkja á jörðinni, eftir því sem við ætti.
„Samkvæmt því ber ábúanda að sinna almennu viðhaldi húsakosts og koma í veg fyrir að hætta stafi af, svo sem að loka dyrum og fergja efni sem getur fokið. Í samningnum er ekki kvöð um að leigutaki fari í kostnaðarsamar endurbætur,“ segir Snævar.